Американскиот Стејт департмент вчера соопшти дека претседателот Џо Бајден одамна јасно ја поддржува модернизацијата на турската флота Ф-16, поздравувајќи ја одлуката на турскиот Парламент да го одобри законодавството поврзано со протоколот за пристапување на Шведска кон Северноатлантскиот договор (НАТО).
Портпаролот на Стејт департментот за Анадолу изјави дека САД со нетрпение очекуваат да го добијат турскиот инструмент за ратификација во Вашингтон. „Како високоспособен одбранбен партнер, брзиот пристап на Шведска во НАТО ќе ја зајакне Алијансата“, рече портпаролот.
Запрашан кога Стејт департментот ќе започне со продажба на борбени авиони Ф-16 на Туркије, портпаролот рече: „Претседателот Бајден одамна е јасен дека ја поддржува модернизацијата на турската флота Ф-16, што е инвестиција во интероперабилноста на НАТО.“
„Оваа предложена продажба ќе ги поддржи националните безбедносни интереси на САД, Туркије и сите сојузници во НАТО. „Конгресот има клучна улога во прегледот на продажбата на оружје, а некои членови на Конгресот јавно кажаа дека одобрувањето на барањето на Шведска за влез во НАТО е од суштинско значење пред да ја поддржат продажбата на Ф-16“, додаде портпаролот.
По расправата за предлог-законот за одобрување на протоколот за прием на Шведска во НАТО во турскиот Парламент, предлог-законот беше одобрен од 287 од вкупно 346 пратеници кои учествуваа во гласањето, додека 55 пратеници гласаа „против“, а четворица беа „воздржани“.
Финска и Шведска, двете нордиски земји кои се близу или граничат со Русија, аплицираа за членство во НАТО веднаш откако Русија ја започна својата војна против Украина во февруари 2022 година.
Финска стана 31-виот сојузник на НАТО во април 2023 година по одобрението од сите парламенти на земјите членки на Алијансата.
Туркије се обидува да го купи од САД најновиот модел авиони „Ф-16 Блок 70“, како и 79 комплети за модернизација за да ги надгради своите преостанати Ф-16 на ниво од Блок 70.
