Туркије официјално го отвори заедничкиот Центар за координација за извоз на украинско жито според договорот постигнат со посредство на Анкара, чија цел е да се обноват испораките за првпат од почетокот на руските напади врз Украина.
Новиот заеднички Координативен центар во Истанбул, формиран како дел од историскиот договор за рестартирање на извозот на украинското жито во светот, денеска беше официјално отворен во Истанбул.
„Центарот ќе обезбеди безбеден поморски транспорт на жито и слични прехранбени производи што ќе се извезуваат од Украина“, рече турскиот министер за одбрана Хулуси Акар на церемонијата на отворањето, одржана во Националниот универзитет за одбрана во Истанбул.
Церемонијата се одржа пет дена откако Москва и Киев ги ставија своите потписи на договорот за испорака на пченица и друго жито преку Црното Море од три украински пристаништа.
Акар рече дека на украинските пристаништа чекаат над 25 милиони тони жито и дека центарот ќе ја следи безбедната испорака од трите пристаништа.
Тој рече дека Туркије се надева дека работата на центарот ќе придонесе за траен мир. Додаде дека Анкара има за цел итен прекин на огнот, намалување на тензиите и испорака на помош во Украина.
Туркије во моментов се подготвува за првите бродови што ќе ја напуштат Украина.
Центарот и договорот за жито ќе дадат „значаен придонес“ за надминување на кризата со храна што ќе влијае на целиот свет, а особено на намалување на цените, додаде тој.
Ако прашањето не беше решено, проблемот со житото можеше да предизвика безбедносни проблеми поради гладот и глобалната миграција, предупреди тој.
„Центарот се состои од пет претставници - и воени и цивилни - секој од Туркије, Русија, Украина и ОН. Нема да има воен елемент на теренот“, рече тој.
Во петокот, на 22 јули, Туркије, Обединетите нации, Русија и Украина потпишаа историски договор за обновување на извозот на жито преку украинските пристаништа Одеса, Черноморск и Јужни по неколкумесечна блокада поради руско-украинскиот конфликт, кој трае веќе шест месеци.
Според договорот, во Истанбул е формиран заеднички координативен центар за да врши инспекции на влезовите и излезите од пристаништата и да ја гарантира безбедноста на рутите.
