15:30 Стапи на сила 3-месечната вонредна состојба во Туркије
Тримесечната вонредна состојба за забрзување на спасувачките и хуманитарните напори во турските провинции погодени од земјотресот стапи на сила во четвртокот, откако беше одобрена од пратениците.
Земјотресите со јачина од 7,7 и 7,6 степени, со епицентар во провинцијата Кахраманмараш, ги почувствуваа 13 милиони луѓе во 10 провинции, вклучувајќи ги Адана, Адијаман, Дијарбакир, Газиантеп, Хатај, Килис, Малатија, Османије и Шанлиурфа.
Неколку земји во регионот, вклучувајќи ги Сирија и Либан, исто така ги почувствуваа силните потреси што ја погодија Туркије за помалку од 10 часа.
Турскиот претседател Реџеп Таип Ердоган во вторникот објави тримесечна вонредна состојба за да се забрзаат напорите за потрага и спасување во провинциите погодени од земјотресот.
15:00 Ердоган: Бројот на загинати во земјотресите се искачи на 16.170
Бројот на загинати во земјотресите во Туркије се искачи на 16.170, изјави претседателот Реџеп Таип Ердоган, а повредени се повеќе од 64.000 луѓе. Уништени се повеќе од 6.400 згради.
Вкупно најмалку 3.162 се потврдени мртви во Сирија, а областите под контрола на владата објавија дека загинале 1.262 лица, а 1.900 загинале во северозападниот дел под контрола на опозицијата. Комбинираниот број на загинати во Туркије и Сирија сега изнесува 17.176.
14:00 Турскиот потпретседател Октај: Во силните земјотреси 14.351 загинат
Најмалку 14.351 лице загинаа, а 63.794 се повредени во двата силни земјотреси што во понеделникот ја потресоа јужна Туркије, изјави денеска турскиот потпретседател Фуат Октај.
„Земјотресот погоди површина од приближно 110.000 квадратни километри. Ова е еднакво или поголемо од површината на многу земји во Европа.“
„Овој земјотрес е трет по големина што се има случено по земјотресот во 1668 година во Голема Анадолија и земјотресот во Ерзинџан во 1939 година во изминатите 2.000 години на просторите на Анадолија“, рече Октај во турскиот Парламент.
За време на посетата на јужната турска област Газиантеп, претседателот Реџеп Таип Ердоган нагласи: „Нашата држава е на терен со сите свои институции од моментот на земјотресот.“
Според турската Агенција за управување со катастрофи и вонредни состојби (АФАД), во моментов на терен во акциите за пребарување и спасување вклучени се над 113.200 лица.
„Вкупно 28.044 лица се евакуирани од регионите погодени од земјотресот“, се наведува во соопштението на АФАД.
Евакуираните лица се сместени во сместувачките капацитети одредени од канцелариите на гувернерите на областите и на АФАД.
„Како резултат на преговорите со турското Министерство за надворешни работи, 5.709 лица кои доаѓаат од други земји за пружање помош се испратени во подрачјата на катастрофата“, се додава од АФАД.
Покрај спасувачките екипи, во погодените области се испратени и ќебиња, шатори, храна и тимови за психолошка поддршка.
„Вкупно 92.738 семејни шатори се поставени за преживеаните“, соопшти АФАД.
Додаде дека во подрачјата се испратени и 5.557 возила, багери, трактори и друга придружна опрема.
„Тимовите во Шанлиурфа и Килис ги завршија операциите за пребарување и се испратени во други области“, соопшти АФАД.
13:20 Бројката на загинати во Сирија се зголеми на 3.162
Најмалку 3.162 лица загинаа, а повеќе од 5.235 се повредени во Сирија од серијата силни земјотреси со епицентри во јужните делови на Туркије, кои во понеделникот го потресоа поголемиот дел од тој регион, покажуваат денешните податоци.
Министерството за здравство на сирискиот режим пријави најмалку 1.262 смртни случаи во провинциите Алепо, Латакија, Хама и Тартус, а повредени се 2.285 лица.
„Најмалку 1.900 луѓе загинаа, а повеќе од 2.950 се повредени во подрачјата под контрола на опозицијата во северозападниот дел на Сирија“, објави Сириската цивилна одбрана.
Голем број згради се уништени или оштетени во подрачјата под контрола на опозицијата во северниот дел на Сирија, каде што спасувачките екипи деноноќно го пребаруваат теренот по преживеани.
12:15 Најмалку 14.000 загинати во силните земјотреси во јужна Туркије
Најмалку 14.014 луѓе загинаа, а 63.794 други се повредени во двата силни земјотреси што во понеделникот ја погодија јужна Туркије, изјави во четвртокот претседателот Реџеп Таип Ердоган.
Земјотресите со јачина од 7,7 и 7,6 степени, со епицентар во провинцијата Кахраманмараш, ги почувствуваа 13 милиони луѓе во 10 провинции, вклучувајќи ги Адана, Адијаман, Дијарбакир, Газиантеп, Хатај, Килис, Малатија, Османије и Шанлиурфа.
„Нашата држава е на терен со сите свои институции почнувајќи од моментот на земјотресот“, рече Ердоган за време на посетата на јужната провинција Газиантеп.
Според Претседателството за управување со катастрофи и вонредни состојби (АФАД) во моментов работат на терен повеќе од 113.200 лица за пребарување и спасување.
11:20 Азербејџански тим спаси 37, меѓу кои 8 деца од под урнатините
Најмалку 37 лица, вклучително и осум деца, беа спасени од азербејџански персонал рано во четвртокот во регионот Кахраманмараш во Туркије, епицентарот на двата силни земјотреси што ја потресоа земјата и регионот во понеделникот.
„Како резултат на операциите за пребарување и спасување 37 лица, меѓу кои осум деца, беа пронајдени живи, а телата на 145 лица беа извадени и предадени на властите“, се вели во соопштението на азербејџанското Министерство за вонредни ситуации (ФХН). .
Во соопштението се наведува и дека навремено ќе бидат доставени дополнителни информации за напредокот на акциите.
Најмалку 725 азербејџански спасувачки персонал отпатуваа во Туркије за да помогнат во операциите за пребарување и спасување по големите земјотреси во 10-те јужни региони на земјата.
10:20 Туркије користи дронови за комуникација во областите погодени од земјотреси
Туркије за првпат ја искористи својата домашна технологија на беспилотни летала за да обезбеди непречена комуникација во областите погодени од катастрофата, рече шефот на турската одбранбена индустрија.
„Беспилотното летало „АКСУНГУР“ пренесува снимки и обезбедува мобилна телефонска комуникација на нашите граѓани во регионот носејќи базна станица на него“, рече Исмаил Демир.
10:00 АФАД: Досега евакуирани 28.044 лица Од подрачјата погодени од земјотресите на југот на Туркије до денес преку копнен и воздушен пат евакуирани 28.044 лица, објави Управата за справување со катастрофи и вонредни ситуации (АФАД).
08:00 Зголемен бројот на загинати во земјотресите
Најмалку 12.873 лица загинаа, а 62.937 се повредени по двата силни земјотреси кои во понеделникот (6 февруари) го погодија југот на Туркије, соопшти АФАД.
Според податоците на АФАД, вкупно 50.818 шатори се поставени за преживеаните. На терен се испратени и 5.434 возила, меѓу кои има багери, трактори и булдожери.
Зголемен бројот на загинати во земјотресите во Сирија Најмалку 2.802 лица загинаа, а илјадници се повредени во Сирија од серијата силни земјотреси со епицентар во јужна Туркије, кои го потресоа поширокиот регион на 6 февруари.
15:00 Шолц: Шокирани сме пред толку многу страдања и уништувања
Канцеларот Олаф Шолц ја потврди солидарноста на Германија со Туркије по разорните земјотреси во кои загинаа повеќе од 8.500 луѓе.
„Шокирани сме пред толку многу страдања и уништувања“, им рече Шолц на пратениците за време на неговото обраќање во парламентот во средата.
„Германската влада веднаш и вети поддршка на турската влада. Ова го потврдив вчера за време на мојот телефонски разговор со претседателот Реџеп Таип Ердоган“, нагласи тој.
Шолц рече дека германските тимови за пребарување и спасување и техничките експерти веќе почнале да работат во регионот на земјотресот и истакна дека дополнителни тимови се на пат.
Канцеларот го пофали и неодамнешниот телефонски разговор меѓу турскиот претседател Реџеп Таип Ердоган и грчкиот премиер Киријакос Мицотакис.
„Соочени со ваква катастрофа, мораме да се зближиме, мораме да се поддржуваме еден со друг“, рече тој.
Германскиот парламент претходно во средата одржа едноминутно молчење за жртвите од земјотресот, а властите во Берлин објавија дека знамињата се спуштени на половина копје на јавните згради во знак на жалост за жртвите.
14:05 Туркијe: Сите главни патишта се повторно отворени за сообраќај по земјотресот
Сите главни патишта во Туркије се повторно отворени за сообраќај, соопштија властите во средата, додека спасувачките напори продолжуваат во јужните делови на земјата кои во понеделникот беа погодени од два силни земјотреси.
„Нема патишта кои се затворени за сообраќај“, се вели во соопштението на Генералната дирекција за автопати.
Властите соопштија дека нивните екипи продолжуваат да работат деноноќно низ целата земја за да обезбедат непречено одвивање на сообраќајот.
11:50 ВО ЖИВО: Турскиот претседател Реџеп Таип Ердоган зборува во Кахраманмараш епицентарот на земјотресите
Турскиот претседател Реџеп Таип Ердоган пристигна во Кахраманмараш, епицентарот на разорните земјотреси кои однесоа илјадници животи во Туркије и Сирија.
„Сите институции и ресурси на државата се на располагање на граѓаните погодени од земјотресот“, рече Ердоган.
Жртвите од земјотресот можат да престојуваат во хотелите во Анталија, Аланија или Мерсин, вели турскиот претседател, додавајќи: „Никогаш не можеме да дозволиме нашите граѓани да останат на улица“.
Претседателот Ердоган најави дека во рок од 1 година ќе бидат изградени нови станбени објекти во 10 провинции погодени од земјотреси
Во земјотресите досега загинаа 8.574 лица, повредени се 49.133, срушени се 6.444 згради, рече тој.
11:00 АФАД: 50.818 големи шатори поставени за сместување на жртвите од земјотресот
Управата за вонредни ситуации (АФАД) соопшти дека е завршено поставувањето на шатори во подрачјата погодени од земјотресите. Досега се поставени вкупно 50.818 големи семејни шатори за сместување на жртвите од земјотресот.
Една од шаторските населби беше поставена на стадионот во Кахраманмараш.
„Вкупниот персонал за пребарување и спасување во регионот составен од персонал од АФАД, Жандармеријата, Министерството за одбрана, Противпожарните бригади, Министерството за образование, невладините организации и волонтери е 79.110. Исто така, 5.309 лица од други држави кои дојдоа на помош се испратени во подрачјето погодено од земјотресите“, се наведува во соопштението.
Во погодените подрачја се испратени вкупно 5.402 возила - багери, шлепери, дигалки, булдожери, камиони, камиони за вода, приколки и други возила.
09:30 Бројот на жртви се искачи на 7.108 во Туркије и 2.530 во Сирија
Најмалку 7.108 луѓе загинаа, а 40.910 други се повредени по двата силни земјотреси во понеделникот што ја погодија јужна Туркије, соопшти во средата Агенцијата за катастрофи на земјата.
Земјотресите со јачина од 7,7 и 7,6 степени, со центар во провинцијата Кахраманмараш, погодија 10 провинции каде живеат повеќе од 13 милиони луѓе.
Неколку земји во регионот, вклучувајќи ги Сирија и Либан, ги почувствуваа силните потреси што ја погодија Туркије за помалку од 10 часа.
Најмалку 2.530 луѓе загинаа, а стотици се повредени во Сирија во серијата силни земјотреси со епицентар во јужна Туркије, кои го потресоа поширокиот регион рано во понеделникот, покажуваат бројките собрани во средата.
Министерството за здравство на сирискиот режим соопшти дека најмалку 1.250 луѓе загинале, а 2.045 други се повредени во провинциите Алепо, Латакија, Хама и Тартус.
08:40 Претседателот Ердоган ќе ги посети погодените области
Претседателот на Туркије Реџеп Таип Ердоган ќе замине во посета на областите кои беа погодени од смртоносните земјотреси во понеделникот.
„Претседателот Ердоган ќе оди во погодената област од земјотресот и внимателно ќе ја следи работата“, објави Дирекцијата за комуникации на Твитер.
Се очекува Ердоган прво да го посети центарот на градот Кахраманмараш, а потоа и областа Пазарџик. Подоцна се очекува претседателот да замине во Хатај.
За брзо спроведување на операциите за пребарување и спасување, Туркије во вторник прогласи вонредна состојба на три месеци во 10 провинции, вклучувајќи ги Адана, Адијаман, Дијарбакир, Газиантеп, Хатај, Кахраманмараш, Килис, Малатија, Османије и Шанлиурфа.
„Се соочуваме со една од најголемите катастрофи не само во историјата на Турската Република, туку и во светот“, рече Ердоган во вторникот.
08:00 Над 6.200 загинати во разорните земјотреси во Туркије
Најмалку 6.234 луѓе загинаа, а 37.011 други се повредени по двата силни земјотреси во понеделникот што ја погодија јужна Туркије, соопшти во средата Агенцијата за катастрофи на земјата.
Земјотресите со јачина од 7,7 и 7,6 степени, со центар во провинцијата Кахраманмараш, погодија 10 провинции каде живеат повеќе од 13 милиони луѓе.
Неколку земји во регионот, вклучувајќи ги Сирија и Либан, ги почувствуваа силните потреси што ја погодија Туркије за помалку од 10 часа.
Повеќе од 79.100 тимови за пребарување и спасување во моментов вршат операции на терен, се вели во соопштението на Претседателството за управување со катастрофи и вонредни состојби (АФАД).
„Како резултат на преговорите со турското Министерство за надворешни работи, во зоната на катастрофата беа испратени 5.309 лица кои доаѓаат од други земји за да помогнат“, се додава.
Покрај спасувачките екипи, во погодените подрачја беа испратени и ќебиња, шатори, храна и тимови за психолошка поддршка.
Тој додаде дека вкупно 50.818 шатори за семеен живот беа поставени за засолниште на преживеаните.
16:00 Полска испраќа рудари во спасувачка операција во Туркије
Полскиот премиер Матеуш Моравјецки изјави дека и група полски рудари ќе заминат во Туркије за да помогнат во спасувачките операции во јужните региони на земјата погодени од земјотресите.
Моравјецки на Твитер истакна дека земјотресите во Туркије се голема трагедија и катастрофа.
Тој додаде дека група полски рудари, исто така, ќе заминат за да учествуваат во напорите за пребарување и спасување. Вчера Полска одлучи да испрати 76 пожарникари и осум кучиња спасувачи во Туркије. Споменатата екипа пристигнала и учествува во спасувачките операции во градот Адијаман.
14:30 Зеленски му изрази сочувството на Ердоган за разорниот земјотрес
Украинскиот претседател Владимир Зеленски имаше телефонски разговор со турскиот претседател Реџеп Таип Ердоган, при што му изрази сочувство во врска со разорниот земјотрес на југот на Туркије.
Во соопштението од Канцеларијата за комуникации на Претседателството на Туркије, се наведува дека Зеленски му пренел сочувство на Ердоган за загинатите во земјотресот и изразил желба повредените што побрзо да закрепнат.
14:00 УНЕСКО загрижен за локалитетите кои се дел од светското наследство
УНЕСКО соопшти дека жали поради земјотресот поради кој се срушија делови од светското наследство на тврдината Дијарбекир и соседните градини Хевсел во Туркије.
Во соопштението се нагласува дека целата област била важен центар на римскиот, сасанидскиот, византискиот, исламскиот и османлискиот период.
Поради временските услови и оддалечената природа на областите што го отежнуваат пристапот и информациите, УНЕСКО соопшти дека може да бидат погодени и други локации на списокот на светско наследство недалеку од епицентарот.
Се вели дека меѓу нив е познатото неолитско место Гобекли Тепе во провинцијата Шанлиурфа, дом на најстарите познати мегалити во светот стари околу 10.000 години.
УНЕСКО е исто така загрижен за локалитетот Немрут Даг, една од најкултните атракции во Туркије поради огромните статуи кои се дел од древна кралска гробница подигната високо на планина, се вели во соопштението.
Третиот локалитет е археолошкиот локалитет Арслантепе надвор од Малатја, град, исто така тешко погоден од земјотресот.
„УНЕСКО ги мобилизира своите експерти за да воспостави прецизен попис на штетите со цел брзо обезбедување и стабилизирање на овие локации“, се вели во соопштението.
13:20 Турскиот претседател Ердоган прогласи 3-месечна вонредна состојба
Турскиот претседател Реџеп Таип Ердоган прогласи 3-месечна вонредна состојба во 10 провинции погодени од разорните земјотреси што ја погодија земјата во понеделникот. Според Ердоган, ова не е само една од најголемите трагедии во историјата на земјата, туку и во светот воопшто.
Тој рече дека повеќе од 8.000 луѓе се спасени од урнатините досега, а 53.317 луѓе се ангажирани за пребарување, спасување и како помошен персонал. Истовремено, 5.000 здравствени работници се испратени во јужните турски провинции каде спасувачките операции се во тек, рече претседателот Ердоган
Според достапните информации, бројот на жртвите од силните земјотреси се искачи на 3.549.
„Имаме 3.549 мртви, 22.168 повредени. Наша најголема утеха е што досега спасивме повеќе од 8.000 наши граѓани од под урнатините“, рече Ердоган.
Турскиот претседател додава дека во подрачјата погодени од земјотресот се испратени 54.000 шатори и 102.000 кревети.
12:40 СЗО: Земјотресот може да погоди до 23 милиони жители
До 23 милиони луѓе би можеле да бидат погодени од силниот земјотрес во кој загинаа илјадници луѓе во Туркије и Сирија, предупреди Светската здравствена организација (СЗО). Институцијата вети долгорочна помош за жртвите.
„Мапите од погодените подрачја покажуваат дека потенцијално 23 милиони луѓе се изложени, вклучително и околу пет милиони кои спаѓаат во ранливи групи“, рече високиот офицер за итни случаи на СЗО Аделхајд Маршанг..
„Цивилната инфраструктура и потенцијално здравствената инфраструктура се оштетени низ погодениот регион, главно во Туркије и северозападна Сирија“, рече таа.
СЗО „смета дека главните незадоволени потреби може да бидат во Сирија веднаш и на среден рок“, рече Маршанг пред извршниот комитет на СЗО во Женева.
„Сега е трка со времето“, рече шефот на СЗО, Тедрос Аданом Гебрејесус, објаснувајќи дека здравствената агенција на ОН итно испраќа помош во областа.
„Мобилизираме резерви за итни случаи и ја активиравме мрежата на итни медицински тимови на СЗО за да обезбедиме суштинска здравствена заштита за повредените и најранливите.
12:10 Се искачи бројот на жртви во Туркије и Сирија
Бројот на загинати во силните земјотреси во Туркије достигна 3.432, а во Сирија се искачи на 1.622. АФАД соопшти дека заклучно со 12.10 часот по локално време, во земјотресите со епицентар во турската област Кахраманмараш загинале 3.432 лица, а 21.103 лица се повредени
Истовремено, информациите од Сирија покажуваат дека најмалку 1.622 лица загинаа, според бројките собрани во вторникот од Министерството за здравство на сирискиот режим и Сирија. Цивилна одбрана.
11:10 Конференција на ЕУ започна со минута молк за жртвите од земјотресот
На барање на високиот претставник за надворешна политика на ЕУ, Жозеп Борел, конференцијата на дипломатската служба на ЕУ за дезинформации започна во вторникот со едноминутно молчење во чест на жртвите во земјотресите што ги погодија Туркије и Сирија.
Борел го започна својот главен говор со жалење за „страшната катастрофа“ во Туркије и Сирија на конференцијата на Европската служба за надворешна акција.
„Морате да се сеќавате на жртвите и на храбрите спасувачи кои сè уште работат деноноќно за да ги пронајдат преживеаните“, рече Борел.
Тој ја повика публиката да го започне настанот со „едноминутно молчење за оние кои починаа и за луѓето кои работат таму“.
10:50 Терористи на ПКК извршија ракетен напад врз регионот зафатен од земјотресот
Терористичката организација ПКК/ЈПГ изведе напад со повеќецевен ракетен систем од подрачјето Тел Рифат врз граничниот премин Онџупинар, во близина на турскиот град Килис
До нападот дојде ден откако регионот го потресоа два разорни земјотреси.
„Терористичката организација ПКК/ЈПГ, на која хуманоста и е непозната, го искористи дури и земјотресот и подло изведе напад со повеќецевен ракетен систем од Тел Рифат врз зоната на одговорност на турскиот граничен премин Онџупинар. Иако нашите единици не претрпеа загуби ниту каква било штета, возвратено е со истрели кон непријателските цели“, се вели во соопштението на Министерството за одбрана на Туркије.
10:20 Спасени над 8.000 лица од под урнатините
Потпретседателот на Туркије Фуат Октај одржа прес-конференција на која соопшти дека досега се спасени над 8.000 граѓани од под урнатините.
Според Октај, бројот на загинати достигна 3.419, а пријавени се 20.534 други повредени.
Тој рече дека се почувствувани најмалку 312 последователни потреси и предупреди дека сеизмичките активности остануваат високи.
Октај рече дека 3.294 лица за пребарување и спасување пристигнале од 14 земји, а донесени се и девет кучиња трагачи за да им помогнат на овие тимови.
„Ние сме благодарни за огромната меѓународна поддршка“, рече Октај.
09:50 Фудбалерот од Гана, Кристијан Ацу извлечен жив од урнатините
Фудбалерот од Гана, Кристијан Ацу, е спасен жив од под урнатините на зграда во јужната турска провинција Хатај, еден од неколкуте региони погодени во смртоносните земјотреси во понеделникот.
Според Мустафа Озат, заменик-претседател на турскиот клуб Хатајспор, 31-годишниот беше „извлечен од урнатините со повреди“.
Танер Савут, спортскиот директор на клубот, сè уште е заробен, изјави Озат.
Репрезентативното крило на Гана, Ацу, кој му се приклучи на Хатајспор минатата година, претходно играше за неколку европски тимови како премиерлигашите Евертон, Челзи и Њукасл Јунајтед, како и за португалскиот клуб Порто.
09:40 ЕУ испрати 27 спасувачки тимови во Туркије
ЕУ испрати 27 спасувачки тимови во областите на Туркије кои беа погодени од земјотресот. Според механизмот за одговор на вонредни ситуации на ЕУ, 27 спасувачки тимови со над 1.150 лица се испратени во Туркије по силните земјотреси во понеделникот, соопшти еврокомесарот за управување со кризи.
„Досега мобилизиравме 27 тимови за пребарување и спасување и медицински тимови од 19 европски земји преку Механизмот за цивилна заштита на ЕУ за да и помогнеме на Туркије по земјотресот“, напиша Јанез Ленарчиќ на Твитер во вторникот.
Туркије е исто така членка на механизмот.
09:00 Бројот на жртви во Сирија се искачи на 1.559
Најмалку 1.559 луѓе загинаа, а стотици се повредени во Сирија во серијата силни земјотреси со епицентар во југоисточна Туркије што го погодија поширокиот регион рано во понеделникот, според бројките собрани во вторникот од Министерството за здравство на сирискиот режим и сириската цивилна одбрана.
08:20 Мајка и три деца се извлечени од урнатините 28 часа по земјотресот
Мајка и три деца се спасени од урнатините 28 часа по разорниот земјотрес што ја погоди јужна Туркије.
Како што јави репортерот на Анадолија, во населбата Низип во Газиантеп, мајката Дона Озкилиќ била спасена од урнатините на зграда, со нејзините деца Абдулкадир, Бејза и Елиф Озкилиќ.
Сите четворица членови на семејството Озкилиќ се хоспитализирани.
08:00 Бројот на жртви надмина 3.300
Најмалку 3.381 лице загинаа, а 20.426 други се повредени во 10 провинции на Туркије по двата силни земјотреси во понеделникот што го погодија јужниот дел на земјата, соопшти во вторникот официјален претставник на агенцијата за катастрофи.
Бројот на загинати лица во земјотресите во Туркије се зголеми на 2.921, додека 15.834 лица се повредени, а спасени се 7.840 лица, соопшти Агенцијата за управување со катастрофи и вонредни состојби (АФАД).
23:00 Бројот на загинати зголемен на 2.379
Бројот на загинатите во земјотресите во Туркије зголемен е на 2.379, а бројот на повредените зголемен е на 14.483, потврди турскиот потпретседател Фуат Октај.
18:50 Ердоган: Туркије прогласи седумдневна жалост
„Поради земјотресите што се случија во нашата земја на 6 февруари 2023 година, прогласена е национална жалост во период од седум дена. Нашето знаме ќе биде на половина копје до зајдисонце во недела, 12 февруари 2023 година, во сите наши и странски амбасади“, истакна турскиот претседател Реџеп Таип Ердоган.
Бројот на загинати се искачи на 1.651
Според досегашните информации, најмалку 1.651 лице загина во земјотресот во Туркије , а други 11.119 се повредени. Спасувачките акции се во тек.
16:10 Путун со пораки за сочувство до Ердоган и Туркије
Рускиот претседател Владимир Путин му изрази сочувство на турскиот претседател Реџеп Таип Ердоган по силните земјотреси што ги погодија јужните провинции и ја поддржа Анкара.
Претседателот Путин телефонски го побарал претседателот Ердоган и го информирал за поддршката за Туркије на полето на пребарување, спасување и помош по разорниот замјотрес.
15:40 Бројот на загинати се искачи на 1.498
Бројот на загинати се искачи на 1.498, соопшти агенцијата за катастрофи, додавајќи дека 8.533 лица се повредени. Речиси 10.000 спасувачи работат на лоцирање на преживеаните.
15:30 АФАД: Речиси 10.000 лица вклучени во спасувачките акции
АФАД објави дека вкупно 9.698 лица за пребарување и спасување и 216 возила биле распоредени во регионот погоден од земјотресот.
Во регионот се испратени вкупно 300.000 ќебиња, 19.772 шатори, 24.172 кревети, 47.176 постелнини и 1.106 кујнски комплети, објави АФАД на Твитер.
Угостителски возила, подвижни кујни и печки, исто така, беа дел од напорите за помош на настраданите.
15:05 Бајден нареди испраќање „секаква потребна“ помош за Туркије
Американскиот претседател Џо Бајден во понеделникот му нареди на својот тим да и обезбеди на Туркије „секаква потребна помош“ и внимателно да ја следи ситуацијата во земјата погодена од силни земјотреси.
„Длабоко сум тажен поради загубата на животи и уништувањето предизвикано од земјотресот во Туркије и Сирија“, напиша Бајден на Твитер.
„Го упатив мојот тим да продолжи внимателно да ја следи ситуацијата во координација со Туркије и да обезбеди секаква потребна помош“, додаде тој.
14:50 Агенција за катастрофи: Бројот на загинати се искачи на 1.121
Најмалку 1.121 лице загинаа, а 7.634 други се повредени во 10 провинции по двата силни земјотреси што ја погодија јужна Туркије во понеделникот, соопшти претставник на Агенцијата за катастрофи на земјата.
Голем број на спасувачки екипи работат макотрпно да ги извлечат преживеаните од под урнатините.
14:25 Спасувачки тимови понудија 13 земји од Европската Унија
По земјотресот, спасувачки тимови за помош на Туркије досега понудија 13 земји на Европската Унија (ЕУ), објави Европската комисија.
„Нашите мисли се со сите оние кои ги загубија најмилите и храбрите кои први реагираа во спасувањето на животите“, се огласија со заедничко соопштение високиот претставник на ЕУ за надворешна политика, Жозеп Борел, и европскиот комесар за управување со кризи, Јанез Ленарчиќ.
Во соопштението се наведува: „Десет тимови за урбана потрага и спасување бргу се мобилизирани од Бугарија, Хрватска, Чешка, Франција, Грција, Холандија, Полска и Романија за да ги поддржат оние кои први реагираа на теренот.“
Портпаролот на Европската комисија, Балаж Ујвари, изјави дека слична помош ветиле и Унгарија, Италија, Шпанија, Малта и Словачка.
Комесарите на ЕУ наведоа дека Центарот за итни случаи на ЕУ се координира со Туркије и државите членки на ЕУ за понатамошната помош.
„ЕУ ги поддржува акциите за спасување со својот сателитски систем Коперникус“, се додава во соопштението.
14: 15 Пендаровски и Новак: Ќе пружиме конкретна помош
Претседателот на Северна Македонија Стево Пендаровски и претседателката на Унгарија, Каталин Новак, која престојува во официјална посета во Скопје, на заедничката прес-конференција посебно се осврнаа на силните земјотреси што ја погодија Туркије, при што изразија подготвеност да испратат конкретна помош.
„Сега добиваме информации дека има втор земјотрес и многу жртви, ужасна деструкција, и би сакал уште еднаш да упатам сочувство до сите погодени и да објавам дека македонската Влада и ние како држава нема да останеме само на зборови, туку и ќе пружиме сосема конкретна помош“, рече Пендаровски.
Споменувајќи го скопскиот земјотрес од 1963 година, тој потсети дека и Северна Македонија низ историјата била погодена од катастрофални земјотреси, додавајќи дека „многу добро знаеме кога некои други народи и држави се наоѓаат во слична ситуација“.
„Нашите мисли се со турскиот народ и со турските граѓани, пред сѐ со оние кои ги изгубија своите најблиски“, додаде Пендаровски.
13:45 МНР: Двајца македонски ученици повредени во земјотресот
Двајца македонски ученици кои се наоѓаат во загрозениот регион во Туркије биле повредени во катастрофалниот земјотрес кој ја погоди земјата, соопшти македонското Министерство за надворешни работи (МНР). Едниот ученик е со потешка повреда, скршеница на која работат лекарски екипи и е во фаза на санирање, додека другиот ученик е со полесни повреди, потврди македонското МНР.
Повредените се дел од група на осум ученици и еден ментор кои престојуваат во Туркије преку програмата „Еразмус плус“.
Од МНР на Северна Македонија соопштија дека до сега нема информации за други македонски државјани кои се загрозени или на кои им е потребна асистенција.
„Нашите претставништва остануваат како во континуирана комуникација со надлежните институции на Туркије така и со наши државјани. По инструкција на МНР дипломат од амбасадата во Анкара е веќе упатен за да помогне во евакуацијата на учениците од градот Кахраман Мараш и да обезбеди информации директно од терен за најзагрозените делови и за евентуални дополнителни интервенции”, велат од македонското министерство за надворешни работи.
Македонските дипломатски претставништва во Туркије се на располагање 24 часа за сите прашања на телефонските броеви +905394569710 во Анкара и +905456149777 во Истанбул.
13:00 Бројот на загинати во Туркије се искачи на 1.014
Бројот на загинати во силните земјотреси во јужна Туркије се искачи на 1.014, соопшти агенцијата за катастрофи. Турската управа за управување со катастрофи и вонредни состојби (АФАД) соопшти дека земјотресот со јачина од 7,7 степени според Рихтеровата скала се случил во 04:17 часот и бил со епицентар во областа Пазарџик во провинцијата Кахраманмараш. АФАД го ажурираше интензитетот на земјотресот од 7,4 на 7,7 степени.
12:35 Преживеани под урнатините: Секоја секунда е важна
Спасувачите макотрпно работат и се борат за секој човечки живот по разорниот земјотрес што ја погоди Туркије, а во кој има стотици загинати и повредени. Речиси на секој час се појавуваат информации за спасени деца, жени, постари жители…
Секоја секунда е важна со цел да се спаси некој човечки живот. На некои места спасувачите користат специјални слушалки за да чујат повик за помош под урнатините по што веднаш се преминува кон отстранување на остатоците.
Турскиот претседател истакна дека во погоденото подрачјето мобилизирани се државните институции со сите свои служби.
„Над 9.000 спасувачи моментално трагаат по исчезнатите во земјотресот, бројот на спасувачи постојано се зголемува. Досега од под урнатините се спасени 2.470 луѓе, бројот на урнати згради достигна 2.818“, рече Ердоган.
Додаде дека е започнато воспоставување на контакти со Туркије со цел меѓународна помош. Според Еродган, НАТО, Европската Унија и 45 земји ѝ понудиле помош на Туркије.
Епицентарот на земјотресот е регистриран во округот Пазарџик во турски Кахраманмараш. Од земјотресот сериозно се погодени и областите Газиантеп, Шанлиурфа, Дијарбакир, Адана, Адијаман, Малатија, Османије, Хатај и Килис.
12:25 Северозападна Сирија прогласена за „зона на катастрофа“
Агенцијата за цивилна одбрана „Бели шлемови“ го прогласи северозападниот дел на Сирија за „зона на катастрофа“ откако силниот земјотрес со епицентар во југоисточна Туркије го погоди поширокиот регион рано во понеделникот.
Во соопштението, агенцијата за спасување ја нарече ситуацијата во северозападна Сирија „катастрофална“ поради уривање на голем број згради и големиот број жртви.
Белите шлемови апелираа за итна помош „во услови на недостаток на способност и услуги, недостиг на засолништа и бурно и студено време“.
Агенцијата, исто така, повика на поголем притисок врз сирискиот режим и неговите сојузници „да се осигураат дека нема да бидат извршени напади врз областите погодени од земјотресот“.
Најмалку 476 луѓе загинаа, а стотици се повредени во Сирија од земјотресот, според бројките собрани од Министерството за здравство на сирискиот режим и сириската цивилна одбрана.
11:49 Нови земјотреси: Еден со јачина од 7,6 степени во Елбистан
Земјотрес со јачина од 7,6 степени според Рихтеровата скала ја погоди Туркије во 13:24 часот по локално време, со епицентар во областа Елбистан во Кахраманмараш, соопшти Турската агенција за катастрофи.
Нови земјотреси ги потресоа Дамаск, Латакија и други сириски провинции, соопшти официјалната новинска агенција САНА
11:45 Ердоган: Најголема несреќа од земјотресот во Ерзинџан во 1939
Туркије ја доживеа „најголемата катастрофа“ по земјотресот во Ерзинџан во 1939 година, изјави претседателот Реџеп Таип Ердоган по силниот земјотрес што ги погоди јужните провинции во понеделник наутро, при што животот го загубија најмалку 912 луѓе.
„Вечерва во 4:17 нѐ потресе најголемата катастрофа од земјотресот во Ерзинџан во 1939 година, која ја претрпевме во минатиот век“, рече Ердоган во главниот град Анкара.
Изјавата на Ердоган дојдоа по земјотресот со јачина од 7,7 степени според Рихтеровата скала што се случи во 4.17 часот (01:17 GMT) и беше со епицентар во областа Пазарџик во јужната провинција Кахраманмараш.
Провинциите Газиантеп, Шанлиурфа, Дијарбакир, Адана, Адијаман, Малатија, Османије, Хатај и Килис се силно погодени од земјотресот.
„Досега 912 наши граѓани ги загубија животите, а 5.385 наши граѓани се повредени“, рече Ердоган.
Тој истакна дека бројот на извлечени од урнатините достигна 2.470, а бројот на зградите што се урнаа е 2.818.
Во моментов, рече Ердоган, вкупно 9.000 лица вршат операции за пребарување и спасување, рече Ердоган, додавајќи: „Овој број постојано се зголемува со оние кои стигнуваат во регионот однадвор“.
„Нè контактираат за меѓународна помош. Покрај понудите за помош од НАТО и ЕУ, 45 земји ни се обратија“, додаде тој.
11:00 Турските вооружени сили воспоставија воздушен коридор за помош
Турските вооружени сили воспоставија воздушен коридор за префрлање на тимовите за пребарување и спасување во регионот погоден од земјотресот во јужна Туркије.
Министерот за одбрана Хулуси Акар во командата на 11. база на воздушниот сообраќај ги следи активностите кои се преземаат по земјотресот.
„Ги мобилизиравме нашите летала за да испратиме медицински тимови, тимови за пребарување и спасување и возила во регионот погоден од земјотресот. Ја максимизиравме подготвеноста на нашите авиони за да го обезбедиме неопходниот транспорт“, рече Акар.
Министерството за одбрана презеде активности за транспорт на тимовите за пребарување и спасување до подрачјето погодено од земјотресот.
Голем број транспортни авиони, меѓу кои транспортни авиони ТАФ А400м, превезуваат тимови за пребарување и спасување и возила во регионот. Во воздушниот коридор за помош учествуваат и амбулантните авиони.
Акар изјави дека и меѓу војниците има жртви во земјотресот.
„Вооружените сили продолжуваат да ги утврдуваат штетите и жртвите во своите редови. За жал, имаме тројца загинати и повредени“, рече тој.
Најмалку 284 лица загинаа, а 2.323 се повредени во десет турски области од силниот земјотрес што утрово ги погоди јужните делови на Туркије.
10:40 Русија: Подготвени да испратиме тим за спасување од 100 луѓе
Министерството за вонредни ситуации на Русија соопшти дека два авиони од типот Илјушин Ил-76 и тим за потрага и спасување од 100 луѓе се подготвени да тргнат за Туркије.
Во соопштението на министерството се наведува дека по налог на рускиот министер за вонредни ситуации Александар Куренков, тим за потрага и спасување од 100 луѓе е подготвен да тргне во Туркије.
10:20 Ковачевски со сочуство до Туркије
Македонскиот премиер Димитар Ковачевски упати порака за сочуство до Туркије и настраданите во земјотресот.
„Ужасна вест за земјотресот во Турција која не растажи сите. Во мое лично и во име на граѓаните на Северна Македонија изразувам длабоко сочуство кон Реџеп Таип Ердоган за изгубените животи, и посакувам брзо опоравување на повредените“, објави Ковачевски на неговата Фејсбук страница.
9:47 Светските лидери изразија солидарност со Туркије
Светските лидери од ЕУ, НАТО и голем број земји изразија поддршка за Туркије по силниот земјотрес.„Длабоко сум тажен откако дознав за разорниот земјотрес што погоди делови на Туркије и Сирија. Моето најдлабоко сочувство до бројните семејства кои ги загубија животите и посакувам брзо опоравување на повредените“, порача Шарл Мишел претседателот на Европскиот совет.
„Длабоко сум ожалостена по ужасниот земјотрес на турско-сириската граница. Моите мисли се со настраданите, со заглавените под урнатините, повредените и со сите спасувачи кои прават сé што можат за да спасат животи“, порача Роберта Мецола претседателката на Европскиот парламент.
„Во контакт сум со претседателот Реџеп Таип Ердоган и министерот за надворешни работи Мевлут Чавушоглу, а сојузниците од НАТО во моментов мобилизираат поддршка“, рече Јенс Столтенберг генералниот секретар на НАТО.
Изразувајќи сочувство со турскиот народ, француската министерка за надворешни работи Катрин Колон порача дека Франција е подготвена да ѝ пружи помош на Туркије.
„Упатуваме наши најдобри желби до граѓаните и сите наши турски пријатели кои се погодени од земјотресот што се случи во Кахраманмараш и кој се почувствува во многу градови, и се надеваме дека ќе ја надминеме оваа катастрофа со најмала штета“, соопшти руската Амбасада во Анкара изразувајќи ја својата солидарност.
09:30 Спасувачки тимови од Холандија и Романија на пат кон Туркија
Спасувачките тимови од Холандија и Романија веќе се на пат за Туркије за да и укажат помош по разорниот земјотрес, изјави денес европскиот комесар за управување со кризи Јанез Ленарчиќ.
„Центарот за координација на ЕУ за итни ситуации го координира распоредувањето на спасувачките тимови од Европа. Тимови од Холандија и Романија се веќе на пат“, објави Ленарчиќ на Твитер, изразувајќи солидарност со Туркије.
09:10 Ердоган од Анкара ќе координира со АФАД
Турскиот претседател Реџеп Таип Ердоган се очекува во Анкара да пристигне во седиштето на АФАД - Турската управа за управување со катастрофи и вонредни состојби од каде ќе ја координира активноста околу катастрофалниот земјотрес со јачина од 7,4 степени кој ја погоди земјата со епицентар во областа Пазарџик.
Во тек се подготовки на претседателството за посета на критичните места откако ќе биде направена проценка на состојбите.
08:02 Серија на потреси
Напорите на спасувачките екипи во потрага по преживеани во урнатите згради и домови е во тек.
Земјотресот во Туркије се случи на длабочина од 7 километри и беше проследен со 66 последователни потреси, според АФАД, вклучително и два со јачина од 6,4 и 6,5 степени што ја погодија југоисточната провинција Газиантеп.
06:27 Украина ќе и помогне на пријателска Туркије
Украинскиот претседател Владимир Зеленски изјави дека неговата земја е подготвена да ја обезбеди потребната помош на пријателскиот турски народ по земјотресот.
„Шокиран од веста за смртта и повредата на стотици луѓе како резултат на земјотресот во Туркије. Изразуваме сочувство до семејствата на жртвите и на повредените им посакуваме брзо закрепнување. Во овој момент стоиме блиску до пријателскиот турски народ, подготвени да ја пружиме потребната помош“, напиша Зеленски на Твитер.
06:13 Италија го намали предупредувањето за цунами по земјотресот
Италијанските власти го намалија рејтингот на предупредувањето за цунами за јужна Италија, кое беше покренато по силен земјотрес што ја погоди централна Турција и северозападна Сирија.
05:20 САД се подготвени да ја обезбедат „сета помош“
„САД се длабоко загрижени од извештаите за денешниот деструктивен земјотрес во Туркије и Сирија“, рече американскиот советник за национална безбедност Џејк Саливан.
„Ние сме подготвени да обезбедиме секаква и целата потребна помош“, рече тој, додавајќи дека претседателот Џо Бајден ги упатил УСАИД и другите партнери на федералната влада „да ги проценат опциите за одговор на САД за да им помогнат на најпогодените“.
„Ќе продолжиме внимателно да ја следиме ситуацијата во координација со владата на Туркије“, рече Саливан.
04:47 МВР на Туркије: Мобилизирани сите спасувачки тимови
Според турскиот министер за внатрешни работи Сулејман Сојлу, првичниот земјотрес бил со епицентар во областа Пазарџик во провинцијата Караманмарас и ги погодил провинциите Хатај, Газиантеп, Османије, Адијаман, Малатија, Шанлиурфа, Адана, Дијарбекир и Килис.
„Јачината од 7,4 степени предизвикува сериозно уништување. Во моментов сите наши гувернери се на чело на нивните должности. Жандармеријата, полицијата, турските вооружени сили, екипи за катастрофи и итни случаи, турската Црвена полумесечина и тимови за пребарување и спасување од целата земја се испратени во регионот“, изјави Сојлу за медиумите.
Турската управа за управување со катастрофи и вонредни состојби (АФАД) соопшти дека земјотресот со јачина од 7,4 степени според Рихтеровата скала се случил во 04:17 часот по локално време, а епицентарот бил во областа Пазарџик. Земјотресот е регистриран на длабочина од 7 километри.
По првичниот земјотрес следеа два силни последователни потреси со јачина од 6,4 и 6,5 степени според Рихтер, кои ја погодија југоисточната провинција Газиантеп.
