Започна судењето на деветмина радикални десничарски екстремисти, кои беа обвинети за заговор за насилен државен удар во Германија.
Осомничените, вклучително и поранешни војници и припадници на резервниот состав беа обвинети дека биле членови на терористичка група, се подготвувале да извршат велепредавство и планирале терористички напади за соборување на владата.
Во обвинението од 605 страници, обвинителите наведуваат дека Маркус Х., Матијас Х., Марко ван Х., Маркус Л., Андреас М., Александар К., Ралф С., Волфрам С. и Стефен В. биле високи членови на воено крило на екстремно десничарската група Патриотска унија.
Според обвинителите, групата планирала сензационални акции како што се упад во германскиот парламент и киднапирање политичари со цел да предизвикаат услови слични на граѓанска војна во земјата и на крајот да ја соборат владата.
Клучните членови на екстремно десничарската група, која ја предводеше германскиот аристократ Хајнрих Ројс, беа уапсени во декември 2022 година.
Полицијата спроведе дополнителни рации во следните месеци и уапси повеќе осомничени поврзани со заговорот за пуч.
Речиси 380 парчиња огнено оружје и над 148.000 парчиња муниција беа запленети при претреси на неколку имоти кои им припаѓаат на членовите на групата и нивните поддржувачи.
Сите осомничени биле членови или следбеници на екстремно десничарското движење Рајхсбургер, кое го отфрла легитимитетот на Сојузна Република Германија и верува дека со земјата управуваат членови на таканаречената „длабока држава“.
Германската разузнавачка агенција проценува дека движењето има околу 23.000 следбеници.
