Разговорите меѓу Русија и САД за подобрување на односите и војната во Украина - први такви разговори по години - завршија по четири и пол часа, објавија во вторникот руските државни медиуми.
На прес-конференција на маргините на средбата во саудиската престолнина Ријад, која директно се пренесуваше на руската телевизија, рускиот претседателски советник Јуриј Ушаков рече дека преговорите биле продуктивни и дека Москва и Вашингтон постигнале договор за меѓусебно почитување на интересите.
Сепак, според Ушаков, датумот на средбата меѓу рускиот претседател Владимир Путин и неговиот американски колега Доналд Трамп се уште не е одреден, а веројатно нема да се одржи следната недела.
„Делегациите на Русија и на САД имаа сериозна дискусија за сите клучни прашања“, рече тој.
Двете страни се договорија и за формирање работни групи за украинското прашање. Иако бројот на членови и конкретни учесници сè уште не се утврдени, двете страни бараат брзо воспоставување контакти, додаде тој.
„Москва и Вашингтон се договорија што поскоро да назначат амбасадори и да ги елиминираат проблемите со функционирањето на дипломатските претставништва, изјави рускиот министер за надворешни работи Сергеј Лавров.
Овие разговори, чија цел беше подобрување на односите, решавање на конфликтот во Украина и подготовка за средба меѓу рускиот и американскиот претседател, претставуваа прва средба меѓу дипломатите од двете земји од почетокот на војната во Украина на 24 февруари 2022 година, пред речиси три години.
