Украинскиот претседател Володимир Зеленски денеска ја истакна важноста на членството во НАТО за обезбедување вистински и траен мир во Украина во 2025 година.
„Нема да имаме друг избор освен да изградиме НАТО во Украина ако членството во НАТО остане затворено за Украина. Ова значи обезбедување на потребното финансирање, воени контингенти и одбранбено производство за да се гарантира мирот. Можеме ли да го направиме ова сами? Не.“, рече Зеленски во воведниот говор на самитот „Поддршка на Украина“ во Киев.
Според Зеленски Украина не заслужува само членство во ЕУ, туку и безбедносни гаранции што ги дава НАТО.
„Оваа година мора да биде година кога започнува вистински и сигурен мир. [Рускиот претседател Владимир Путин нема да ни го даде овој мир, ниту ќе го даде во замена за нешто. Мораме да постигнеме мир преку сила, мудрост и единство на нашата соработка“, рече Зеленски
Тој смета дека поради тоа што војната се води против Украина, оваа земја мора да биде на преговарачка маса.
Самитот, кој се одржа на третата годишнина од војната на Русија против Украина, ги собра лидерите од Летонија, Литванија, Естонија, Шпанија, Канада, Финска, Данска, Исланд, Норвешка и Шведска, меѓу другите. Присутни беа и претседателката на Европската комисија Урсула фон дер Лајен и претседателот на Европскиот совет Антонио Коста.
Лидерите на некои земји се приклучија на сесијата преку видео-конференција.
Американскиот претседател Доналд Трамп се залагаше за мировен договор за Украина со Русија, а украинските и европските претставници досега беа надвор од дискусиите.
Неговата администрација, исто така, посочи дека надежите на Украина за влез во НАТО и враќање на границите пред 2014 година се нереални.
