Двата земјотреси со јачина од 7,7 и 7,6 степени по Рихтер минатата недела погодија огромен број жители во југоисточните провинции на Туркије и соседна Сирија.
Вкупниот број на загинати во две земји надмина 34.000, што го прави најсмртоносниот земјотрес на векот во регионот.
Одвреме-навреме, визуелните слики на спасувачите кои извлекуваат доенчиња, и деца од најдлабоките делови на бетонските урнатини стануваат вирални на социјалните мрежи. Луѓе од целиот свет ги опишуваат таквите приказни за преживување како чуда.
Еве дел од чудесните спасувања на деца изминатите неколку дена.
1. Хамза, седуммесечно бебе, беше спасено во провинцијата Хатај, еден од најпогодените региони во Туркије, откако беше заглавено под урнатините повеќе од 140 часа од првиот земјотрес што ја погоди земјата.
2. Алије Дагли, двегодишно девојче, исто така беше извлечено живо од урнатините во Хатај благодарение на напорите на тимот за пребарување и спасување и волонтерите на АФАД речиси 133 часа по разорните земјотреси. На бебето кое на рацете на медицинскиот персонал било пренесено во амбуланта му била укажана помош.
3. Бебе кое се проценува на околу два месеци беше пронајдено живо 128 часа по земјотресот во Хатај. Снимките од преживувањето на бебето речиси пет дена без никакви повреди ги расплака луѓето и стопли многу срца. Во тек се напори за идентификација на бебето, бидејќи родителите на новороденчето се уште се водат како исчезнати.
4. 15-месечниот Јусуф Хусеин е изваден по 105-тиот час од земјотресот. Околу 20 минути подоцна, неговиот 7-годишен брат Мохамед Хусеин беше извлечен од истиот куп бетонски плочи од она што порано беше трикатна зграда во Хатај.
5. Само 10 дена стариот Јагиз Улас можеби е најмладиот преживеан од земјотресот, кој беше ослободен од урнатините во Хатај со неговата мајка. Минаа 101 час во урнатините, на зимскиот студ.
6. Во Кахраманмараш, епицентарот на разорниот земјотрес, едногодишната Раха и нејзината мајка Ела Хамоко од сириско потекло беа спасени откако беа заробени во урнатините 81 час.
7. Петгодишната Хазал Гунер била спасена во Хатај откако била заробена во урнатините цели 72 часа. На прашањето дали сака да пие вода кога ја извлекле од урнатините, таа одговорила: „Не, сè уште не сум прегледана“. Со мајка си била однесена во болница на лекарски преглед.
Доенчиња без придружба
Министерството за семејство и социјални услуги на Туркије соопшти дека ги сместиле сите деца без придружба во државни засолништа.
Се вели дека ќе бидат иницирани соодветни процедури за сместување на малолетниците и децата без придружба со соодветни згрижувачки домови за да се обезбеди стабилна и сигурна средина за нивно растење и напредување.
Досега од урнатините се спасени 263 деца, соопшти Министерството за семејство и социјални услуги. Меѓу нив, на 162 деца им се пружа медицинска помош во различни болници, а 101 се испратени во прифатилиштата со кои раководи Министерството.
