Продажбата на електрични и плаг-ин хибридни возила се зголеми за 21 отсто на годишно ниво во јули, најмногу благодарение на растот во Кина, додека Европа забележа пад на побарувачката, објави во понеделникот компанијата за истражување на пазарот Ро Моушн (Rho Motion). Во јули ширум светот беа продадени 1,35 милиони електрични возила - целосно електрични (БЕВ) или плаг-ин хибридни (ПХЕВ). Од нив, 880.000 се продадени во Кина, што претставува раст од 31 отсто на годишно ниво, покажуваат податоците. Во првите седум месеци од 2024 година, бројот на продадени плаг-ин хибриди во Кина се зголеми за 70 отсто во споредба со истиот период минатата година. Кинескиот и најголемиот производител на електрични возила во светот, БИД (BYD), објави дека ја зголемил својата глобална продажба на БЕВ и ПХЕВ за 13 и 44 проценти, соодветно, во истиот период. Во Европа, на месечно ниво во јули, продажбата е намалена за 7,8 отсто, додека во седумте месеци од годинава таа е непроменета во однос на истиот период лани. Во Германија, најголемиот пазар за електрични возила во ЕУ, во првите седум месеци од оваа година, продажбата е намалена за 12 отсто во споредба со истиот период лани. Во САД и Канада, продажбата на електрични возила се зголеми за 7,1 отсто во јули.
„БИД продолжи со својата рекордна продажба на плаг-ин хибриди и овој месец, што е клучен придонесувач за глобалната продажба бидејќи неговиот обем на продажба е голем. Возила со зголемен опсег, хибридни автомобили на батерии кои се полнат со помош на генератор на одборот, исто така се продаваат во голем број“, рече Чарлс Лестер од Ро Моушн. Тешко е да се очекува раст на побарувачката на електрични автомобили во Европската унија, имајќи предвид дека Унијата во јули воведе привремени царини за увоз на електрични автомобили произведени во Кина - од 17,4 на 37,6 отсто.
