Туристичката индустрија продолжува да се опоравува од најтешката криза во досегашната историја бидејќи бројот на пристигнувања достигна 84% од нивоата пред пандемијата помеѓу јануари и јули 2023 година, покажуваат најновите податоци на Светската туристичка организација на Обединетите Нации - УНВТО.
Блискиот Исток, Европа и Африка го предводат закрепнувањето на глобалниот сектор. Најспоро враќање на посетителите од предпандемиските нивоа има во азискиот дел на Тихиот Океан.
Зошто 27 септември?
Светскиот ден на туризмот се одбележува секоја година од 1980 година. Датумот ја одбележува годишнината од усвојувањето на Статутот на Организацијата во 1970 година, отворајќи го патот за основање на УНВТО пет години подоцна.
Дополнително, 27 септември има значење бидејќи го означува преминот помеѓу високата туристичка сезона на северната хемисфера и почетокот на туристичката сезона на јужната хемисфера. Овој тајминг гарантира дека Светскиот ден на туризмот го привлекува вниманието и на воспоставените и на новите туристички дестинации.
Неопходна е одржливост во туризмот
Додека масовниот туризам привлекува најмногу внимание, се повеќе се разговара за проблемите со одржливоста, особено на популарните дестинации кои стануваат мета на последици врз животната средина, природата и локалното население.
Истовремено речиси секој десетти човек на планетата е вклучен во туристичката индустрија, но дури 50% од младите не може да се вработат поради структурните пречки како недостиг на ресурси, немање пристап до соодветно образование и ресурси.
„Туризмот никогаш не бил поважен за нашите економии или за нашите општества. Неговиот потенцијал е огромен. И така, на овој Светски ден на туризмот, ја славиме способноста на туризмот да го поттикне растот, истовремено истакнувајќи ја виталната потреба од инвестиции за да се обезбеди таков раст да биде инклузивен и одржлив“, посочи Зураб Пололикашвили Генерален секретар на УНВТО.
УНВТО ги идентификуваше инвестициите како еден од клучните приоритети за закрепнување на туризмот и идниот раст и развој. За Светскиот ден на туризмот 2023 година, УНВТО ја нагласува потребата од повеќе и подобро насочени инвестиции за луѓето, за планетата и за просперитет.
Сега е време за нови и иновативни решенија, а не само за традиционални инвестиции кои го промовираат и поткрепуваат економскиот раст и продуктивноста, посочува светското туристичко тело.
