Аортата, главната и најголемата крвна артерија, која носи крв од срцето до остатокот од телото, доби посебна чест во медицинскиот свет - таа е препознаена како посебен човечки орган.
„Тоа е голем чекор. Препознавањето на аортата како орган ја става на исто ниво со другите органи, срцето, белите дробови и мозокот“, вели Мартин Черни од Универзитетската болница во Фрајбург во Германија.
Новиот статус на органот важи во земјите од Европската унија и САД, откако како таков беше дефиниран во упатствата на Европската асоцијација за кардиоторакална хирургија (EACTS) и Американското здружение на торакални хирурзи (СТС).
Оваа одлука ќе направи разлика и за пациентите, бидејќи клиничкиот процес за многу од нив кои се лекуваат од аортна болест веројатно ќе биде различен и, се надеваме, пооптимален од сега па натаму.
Досега беше вообичаено болестите на аортата да се третираат или со кардиохирургија или со васкуларна хирургија, во зависност од видот и локацијата.
„Новите упатства јасно препорачуваат третман на аортата како дел од посебна медицинска област. Треба да се поврзе со други слични области на медицината“, објасни Черни, директор на Болницата за кардиоваскуларна хирургија во Германија.
Сето тоа ќе го подобри лекувањето на руптури на аортата и други сериозни болести, додаде Черни. Аортата е одговорна за транспорт на крв богата со кислород од срцето до телото.
Овој голем крвен сад е најголемата артерија во телото и се протега од левата комора до садовите во карличната област. Исто така, има значајна улога во регулирањето на крвниот притисок и брзината на протокот на крв.
