На младите луѓе треба да им се забрани да купуваат тутунски производи до 22-годишна возраст, сугерираат научниците откако истражување покажа дека оние кои почнуваат да пушат пред 20-та година потешко се откажуваат од пушењето.
Научниците веруваат дека зголемувањето на законската минимална возраст ширум светот може да ја намали зависноста од никотин.
Тим од Јапонија набљудувал 1.382 пушачи кои посетиле клиника за откажување од пушење во Кјото. Пациентите биле поделени во две групи врз основа на возраста на која почнале да пушат - помлади од 20 години или 20 години и постари.
Сите го исполниле Фагерстромовиот тест за зависност од никотин (ФТНД), стандардна алатка за проценка на интензитетот на физичката зависност на една личност од никотин.
Во тестот има прашања како „колку брзо по будењето ја пушите првата цигара?“ и „колку цигари дневно пушиш?“, а пациентите давале одговори кои биле бодувани.
Бодовите потоа се собираат за да се добие ниска зависност (еден до два), ниска до умерена (три до четири), умерена (пет до седум) или висока зависност (осум или повеќе бодови).
Бил мерен и јаглерод моноксид во здивот за да се покаже колку цигари тестираниот испушил во последните 24 часа.
Вкупно 556 пушачи почнале да пушат пред да наполнат 21 година, што е законска возраст во Јапонија, додека 826 од нив почнале кога наполниле 20 години.
Оние кои ја започнале оваа навика пред 21-та година пријавиле дека пушат 25 цигари на ден во споредба со 22 дневно во групата во која почнале да пушат подоцна. Оние кои почнале порано, исто така, имале повисоки респираторни нивоа на јаглерод моноксид во здивот.
Од оние кои рано почнале да пушат, 46% успешно се откажале, во споредба со 56% од оние кои почнале да пушат на возраст над 20 години.
Наодите беа презентирани на Конгресот на Европското здружение за кардиологија (ЕСЦ) 2023 година во Амстердам.
„Нашите резултати покажуваат дека раното започнување со пушење е поврзано со поголема зависност од никотин, дури и во младата зрелост, рече авторот на студијата, д-р Коџи Хасегава од Националната болничка организација на Медицинскиот центар во Кјото.
Студијата покажува дека зголемувањето на законската возраст за купување тутун на 22 или повеќе години може да доведе до намалување на бројот на зависници од никотин и изложеност на ризик од негативни здравствени последици.
Во повеќето земји во светот мора да имате над 18 години за да купите цигари, додека во некои американски држави мора да имате најмалку 21 година.
