Речиси половина од светското население, или 3,5 милијарди луѓе страдаат од болести на усната празнина, а повеќето од нив живеат во земјите со низок и среден приход, објави Светската здравствена организација (СЗО).
Најчеста болест на усната празника е кариесот, а следуваат тешки болести на непцата, губитокот на забите и рак на усната празнина. Кариесот не се лекува кај речиси 2,5 милијарди луѓе, според податоците на агенцијата на Обединетите нации.
Околу 380.000 нови случаи на ракот на усната празнина се дијагностицира секоја година, наведува СЗО. Како две главни причини за високата стапна на болеста на усната празнина, СЗО наведува дека јавното здравство не покрива лекување на забите како и недостапност на високо специјализираната дентална опрема во примарната здравствена заштита, особено во сиромашните земји.
„Оралната хигиена одамна е занемарена во глобалното здравје, но многу болести на усната шуплина може да се спречат“, изјави генералниот директор на СЗО, Тедрос Аданом Гебрејесус.
Агенцијата смета дека дел од решението е во тоа земјите да вклучат праведна здравствена заштита за усната празнина во програмите на национално планирање и оралното здравје да го вклучат во моделите на примарна здравствена заштита. Меѓу мерките на владата им се предлага на населението да му ја подобрат достапноста на паста за заби со флуор по пристапна цена.
