Кандидатот за бугарски премиер Росен Жељасков денеска го прифати мандатот од претседателот Румен Радев за формирање влада.
Жељасков, кој беше предложен за премиер од групата ГЕРБ-СДС, на Радев му достави предлог за состав на неговиот кабинет, а бугарскиот претседател денеска до парламентот на одобрување ќе го достави Указот за избор на Жељасков за премиер на Бугарија.
Предложени се тројца вицепремиери, Томислав Дончев од ГЕРБ, Атанас Зафиров од Бугарската социјалистичка партија и Гроздан Караџов од партијата „Има таков народ“, како и 19 министри.
Според овој предлог, коалицијата ГЕРБ-СДС ќе има 11 министри, Бугарската социјалистичка партија ќе има пет претставници во владата, а „Има таков народ“ ќе има четворица.
Овој потег уследи по неколкумесечни тешки коалициски преговори во кои лидерот на ГЕРБ и поранешен премиер Бојко Борисов беше одбиен како кандидат за премиер.
Парламентарните избори во Бугарија се одржаа на 27 октомври 2024 година, а Радев одлучи да им даде дополнително време на партиите да преговараат пред првиот мандат, нагласувајќи дека тоа го направил „со надеж дека преговарачите ќе разберат дека нивната одговорност оди подалеку од партиските интереси и нивните изборни тело, и дека тие се одговорни пред целиот бугарски народ“.
Во октомври во Бугарија се одржаа парламентарни избори, седми во последните две години, на кои најмногу гласови или околу 25 отсто од гласовите освои централнодесничарската партија ГЕРБ на поранешниот премиер Бојко Борисов.
