Изминатото деноноќие на територија на државата има вкупно 30 пожари на отворен простор, од кои 10 се уште активни, информира Центарот за управување со кризи (ЦУК).
Под контрола е ставен еден пожар на отворено во Македонски Брод, кај с. Дивеч и с. Слатина, каде што гори мешена шума, а 20 пожари се целосно изгаснати, меѓу кои неколку на депонии и ѓубришта во Скопје.
Претходните денови, како што велат од ЦУК, имало случаи кога изгаснати пожари повторно се разгорувале.
Покрај пожарникатите, во гасењето на пожарите ангажирани се и два „ертрактори“ на Дирекцијата за заштита и спасување, два хеликоптери на Министерството за внатрешни работи и 90 армиски припадници.
Активни пожари се во Старо Нагоричане, кај селата Алгуња и Челопек, каде се ангажирани хеликоптер на МВР и 30 припадници на Армијата, на планината Серта кај штипските села Селце и Пухче, како и на Криволак кон Пенуш, кај Македонски Брод и Јасен, каде е ангажиран хеликоптер на МВР, вработени во Јасен и 30 припадници на Армијата. Гори и кај Пласница, Чашка, Долнени и Ново Село.
Министерот за одбрана, Владо Мисајловски денеска информираше дека во најбрз можен рок до Владата ќе биде доставен нов закон за пожарникарите.
„Министерството за одбрана во наредниот период ќе ги испита предлозите за кои во изминатите неколку години, работни групи од повеќе надлежни институции за оваа проблематика работеа на подготовка на новиот Закон за пожарникари и во најбрз можен рок најверојатно ќе излезе со предлог до Владата“, истакна Мисајловски.
Според него, дел од платите на пожарникарите се обезбедуваат преку наменски дотации буџетот на Министерството за обрана. На ниво на држава 734 пожарникари се финансираат преку наменски дотации.
Во гаснењето на пожарите низ земјава учествуваат припадници на Армијата, но и еден воен хеликоптер.
Мисајловски најавува дека во иднина ваквата слика ќе се подобри бидејќи се очекува новите осум хеликоптери Агуста 149 и Агуста 169, кои земјава ги нарача од италијанската компанија Леонардо, да имаат инсталација за ваква намена и во иднина ќе се користат за гасење пожари.
