Јелена Танасковиќ, в.д директорката на „Инфраструктура на железницата на Србија“, во средата поднесе оставка.
Станува збор за државно претпријатие, кое е инвеститор во реконструкцијата на зградата на Железничката станица во Нови Сад.
Во Нови Сад на 1 ноември се урна настрешницата на Железничката станица при што загинаа 15 лица, додека две тешко повредени лица се уште се борат за живот во Универзитетскиот клинички центар во Војводина.
Танасковиќ е трет функционер кој поднесе оставка поради овој случај.
Прв беше Горан Весиќ, министер за градежништво, транспорт и инфраструктура на Србија.
Денеска Томислав Момировиќ, министер за внатрешна и надворешна трговија на Република Србија, кој ја извршуваше функцијата министер за градежништво, транспорт и инфраструктура од 2020 до 2022 година, односно во времето кога беа потпишани договорите за реконструкција на станицата, исто така поднесе оставка.
Претседателот на Србија, Александар Вучиќ вчера изјави дека поради трагедијата во Нови Сад очекува оставки во Владата и на други места и мерки од обвинителството што е можно поскоро.
