Во Република Србија во недела на 17 декември ќе се одржат вонредни парламентарни избори, избори за Собрание на автономната покраина Војводина и локални избори за главниот град Белград и уште 65 други локални самоуправи.
Изборниот молк во пресрет на изборите ќе започна на полноќ, ноќта меѓу четврток и петок (14 и 15 декември), а ќе трае до затворање на избирачките места во недела, во 20 часот.
Изборниот молк е период во кој е забрането објавување проценки на изборните резултати во медиумите и на јавни собири, јавно презентирање на кандидатите на изборите и нивните изборни програми и поканување на гласачите да гласаат или да не гласаат за одредени изборни листи или кандидати.
Изборниот молк започнува 48 часа пред денот на изборите и трае до затворање на избирачките места. На гласачкото место и на 50 метри од избирачкото место, забрането е истакнување симболи на политички партии и друг пропаганден материјал.
Законот за избор на народни пратеници на Србија предвидува парични казни за прекршување на правилата за изборен молк, како за правните, така и за физичките лица. Ова се однесува на телевизијата, радиото, печатените медиуми, но и за интернет порталите кои се регистрирани како медиуми, додека кампањата на социјалните мрежи не е регулирана со закон.
Право на глас на парламентарните избори имаат 6.500.165 граѓани, на покраинските избори во Војводина 1.669.734, а на белградските 1.613.190 гласачи, соопшти Републичката изборна комисија (РИК).
РИК утврди дека на гласачкото ливче ќе има 18 изборни листи со вкупно 2.817 кандидати. Избирачките места се отвораат во 7 часот, а се затвораат во 20 часот.
