Силна експлозија одекна во петокот вечерта во селото Вараге во Зубин Поток, на северот на Косово.
Косовската полиција соопшти дека од оваа експлозија бил оштетен водоводниот канал Ибар-Лепенци.
Заменик-директорот на полицијата за северниот регион, Ветон Елшани, за медиумите ја потврди експлозијата во водоводниот канал, велејќи дека полициските екипи работат на што поскоро расчистување на случајот.
Премиерот на Косово, Албин Курти изјави дека нападот на северот на Косово е „криминален и терористички и доаѓа од банди организирани од Србија.“
Курти рече дека овој напад имал намера да ја оштети критичната инфраструктура на Косово „можеби најважната што ја имаме и без сомнение е обид да се загрози снабдувањето со електрична енергија и вода во нашата земја“, притоа најавувајќи дека ќе го собере Советот за безбедност на Косово и ќе се сретне со командантот на КФОР.
Претседателката на Косово, Вјоса Османи-Садриу, преку социјалните мрежи го опиша инцидентот како „терористички чин во кој беше нападната виталната инфраструктура на земјата.“
„Српските криминални банди изгубија во секоја битка со институциите на Косово. Повторно ќе изгубат, во нивните кукавички обиди да ја нападнат виталната инфраструктура на нашата Република преку терористички акти. Заштитата на уставноста и законитоста во секој агол на земјата и од витално значење е бескомпромисна војна кон овие криминални елементи“, рече претседателката Османи.
Нападот го осуди и американскиот амбасадор во Косово Џефри Ховениер.
„Овие насилни акции немаат место во едно демократско општество, додека одговорните за овие криминални напади врз легитимните власти на Република Косово мора да одговараат. Соединетите Држави ќе продолжат да се солидаризираат со народот и владата на Косово пред криминалните напади“, пишува Ховениер во објава на социјалната мрежа X.
Шефот на Канцеларијата на ЕУ во Приштина, амбасадорот Аиво Орав, осудувајќи го нападот, рече дека инцидентот треба да се истражи и одговорните да бидат изведени пред лицето на правдата.
На косовските власти веќе им понудив помош од ЕУ“, напиша Орав во реакцијата на платформата Х.
Регионалното водостопанство „Митровица“ соопшти дека е прекинато снабдувањето со вода за пиење поради оштетување на дел од каналот Ибaр-Лепенци. Ова претпријатие ги повика граѓаните да обезбедат резерви на вода за пиење.
Енергетската корпорација на Косово (КЕК) објави дека е во комуникација со релевантните актери, додавајќи дека се надева на брзо разрешување на ситуацијата.
Ова е трет напад по ред на северот на Косово и втор во текот на вчерашниот ден. Во општина Звечан беше фрлена бомба врз полициската станица и во дворот на општината.
За целата оваа ситуација косовската полиција во петокот соопшти дека ги зголемила безбедносните мерки низ целата земја.
