Српскиот претседател Александар Вучиќ синоќа објави дека ко-основачот на „Ејпл“ (Apple), Стив Возниак и неговата сопруга ќе добијат српско државјанство и пасоши.
„Тие денес или утре ќе станат државјани на Србија и тоа е најголема можна чест за нас“, рече Вучиќ по средбата со Возниак во Белград.
Вучиќ за време на своето обраќање пред медиумите најпрво го претстави Возниак и неговите достигнувања.
„За нас разговорот за образованието беше од клучно значење. Како да се промени свеста на сите луѓе дека образованието е една од најважните алки за нас“, рече Вучиќ.
Возниак е вклучен во различни деловни и филантропски потфати низ годините, фокусирајќи се првенствено на учење компјутерски вештини на деца од 11 до 13 години во училиштата.
Тој, исто така, основаше пост-средно образование и платформа за обука фокусирана на софтверско инженерство и развој на технологија.
Премиерката Ана Брнабиќ рече дека посетата на Возниак на Србија е резултат на долгорочната инвестиција на државата во образованието и особено во секторот на информатичката технологија.
