Дигиталната ера сè повеќе продира и на Балканот. Поголемиот дел од Балканот е покриен со квалитетна интернет мрежа, но новите технологии како 5G се очекува да го направат интернетот уште попристапен и побрз.
Интернетот нуди можности за наоѓање различни информации, комуникација со луѓе од целиот свет, управување со финансии, купување од дома, рекреација со музика, видеа, игри и многу повеќе.
Но, колку граѓаните од Западен Балкан го користат интернет?
Косово води во користење интернет
Податоците на Евростат покажуваат дека Косово и Албанија водат по бројот на домаќинства кои имаат интернет конекција дома. 96% од домаќинствата во Косово и 91% од домаќинствата во Албанија се поврзани на интернет со која било од телекомуникациските компании кои нудат услуги во овие земји.
Голем процент од домаќинствата во Северна Македонија (84%), Србија (82%) и Црна Гора (81%) исто така имаат интернет конекција дома.
Во Босна и Херцеговина 3/4 од домаќинствата имаат пристап до интернет.
Регионот како целина малку заостанува зад Европската унија, каде што 92% од домаќинствата се претплатуваат на интернет услуги.
Во Европа цвета продажбата онлајн, на Балканот социјалните мрежи
Граѓаните на Западен Балкан се меѓу најголемите корисници на социјалните мрежи во Европа. Секоја од балканските земји надминува 60% од населението на возраст од 16 до 74 години кое има профили на некоја од социјалните мрежи.
Прва во регионот е Северна Македонија со 74% од населението присутно на некоја социјална мрежа. Црна Гора е на второ место со 71%.
Албанија (61%) и Србија (60%) ја следат листата на земји од Балканот со речиси 2/3 од населението кои ги користат социјалните мрежи.
Голем број корисници на социјалните мрежи имаат и Косово и Босна и Херцеговина, иако Евростат нема податоци за нив.
Во поголемиот дел од Западна Европа, процентот на населението на социјалните мрежи е многу помал отколку на Балканот. Германците и Французите имаат просек од околу 40%, додека Италијанците околу 50%. Исклучок се земјите од Бенелукс и Швајцарија, каде што бројот на луѓе кои ги користат социјалните мрежи е сличен на Балканот.
Онлајн пазарење
Бизнисот сè повеќе се движи на интернет и тоа го покажуваат бројките. Околу 66% од жителите во земјите на Европската унија направиле онлајн трансакции во 2021 година. Во некои земји дури 9 од 10 луѓе купиле производ или онлајн услуга барем еднаш годишно.
Земјите од Западен Балкан сè уште се далеку од овој просек. Онлајн купувањето најмногу се користи во Косово, каде 46% од населението извршило онлајн купување во рок од 1 година. Веднаш потоа доаѓаат граѓаните на Србија, околу 45% од нив се корисници на онлајн „дуќани“.
Во Северна Македонија 34% од населението користи онлајн купување, во Босна и Херцеговина 30%, додека во Црна Гора само 26% од населението. Во овој извештај нема податоци за Албанија.
Онлајн безбедноста останува предизвик за балканските земји
Рамо до рамо со многуте можности што ги нуди интернетот, доаѓаат и големи ризици. Граѓаните на Западен Балкан сè почесто известуваат дека биле жртви на онлајн злоупотреба.
Криминалите преку интернет се многубројни, од кражба и злоупотреба на лични податоци до финансиски измами.
Финансиските криминали на интернет се зголемуваат и често остануваат нерешени од властите, особено ако криминалците доаѓаат од други земји.
Затоа, важно е да се заштитат личните податоци, а не да се даваат податоците за картичките на сомнителни и непознати сајтови кои нудат услуги или производи за продажба.
