Со интонирање на државната химна во Народното собрание на Србија во вторник се одржа конститутивна седница на која беа потврдени мандатите на 250 пратеници од новиот собраниски собир.
Почетокот на седницата беше означен со протести, свирежи и транспаренти на кандидатите за пратеници од опозициската листа „Србија против насилството“, а набргу по почетокот беше распишана пауза, по што седницата продолжи.
Дел од пратениците положија и потпишаа заклетва во салата, а дел ја напуштија седницата и дадоа заклетва во собранискиот ходник.
Претседавачот Стојан Раденовиќ, најстариот пратеник, рече дека се потврдени мандатите на пратениците и рече дека Собранието е конституирано и дека пратениците „навремено ќе бидат известени за продолжението на седницата“.
На дневен ред беа и избор на претседател на парламентот, избор на потпретседател, именување на генерален секретар на Народното собрание, избор на членови на работни тела и избор на членови на постојани парламентарни делегации во меѓународни институции.
Со конституирањето на собранието почнува рокот од 90 дена за формирање на новата Влада на Србија.
На изборите на 17 декември минатата година учествуваа 18 изборни листи, а десет од нив добија пратенички мандати.
СНС има 129 мандати, „Србија против насилство“ 65, СПС 18, НАДА 13, „Ние глас на народот“ 13, СВМ 6, „Зукорлиќ“ 2, „Угљанин“ 2, „Камбери“ 1 и Руската партија 1 мандат, објави Републичката изборна комисија.
