Во Општина Звечан на северот на Косово српските граѓани продолжија со мирниот протест, додека војниците на КФОР ја обезбедуваат општинската зграда и стационирани се на пет други локации.
На главната улица, на околу 50 метри од општинската зграда, сѐ уште се поставени метална ограда и бодлива жица, зад која се војниците со полна опрема, но помалку на број од претходните денови.
Војниците на КФОР од вчера се распоредени на уште пет различни точки во градот, по барањето на претседателот на Српска листа, Горан Ракиќ, да се зголеми нивното присуство и во околните улици и на самиот влез во градот.
Вработените во Општина Звечан, кои од петок не можат да влезат во општинската зграда, се потпишуваат на улицата на почетокот и на крајот на работното време. Во Звечан, од понеделник, училиштата се затворени, а на протестот учествува и наставниот кадар.
Протестот се одвива мирно, а насобраните граѓани седат на клупи поставени под големи чадори.
Од понеделникот српските граѓани секојдневно протестираат во три општини на северот на Косово, Звечан, Зубин Поток и Лепосавиќ. Од протестот се пратени барања специјалците на Полицијата на Косово да се повлечат од општинските згради, а градоначалниците избрани на изборите на 23 април да не доаѓаат во општинските објекти.
Во петокот се случија судири кога специјалните единици на Полицијата на Косово го асистираа влегувањето на новите градоначалници во општинската зграда во Звечан.
Потоа, во понеделникот, се случи судир меѓу демонстрантите со војниците на КФОР, кога беше потврдено дека се повредени 30 меѓународни војници и десетици демонстранти.
Српска листа на почетокот на ноември ги напушти сите косовски институции на северот на Косово поради одлуката за задолжителна пререгистрација на возилата од српски во РКС таблички и поради тоа беа распишани вонредни избори.
Српската заедница ги бојкотираше тие избори, па излезноста на гласачите беше помала од четири отсто и за градоначалници беа избрани албански кандидати.
