Премиерот на Косово Албин Курти изјави дека никогаш нема да разгледува ниту еден модел на територијална автономија.
Курти рече дека за првпат од почетокот на дијалогот со Србија, нормализацијата не е дел од усни ветувања, туку од писмени. Тој рече дека новиот процес донесе нов договор, за што Курти изрази уверување дека тој носи нова отвореност кон конечниот резултат. За процесот на дијалогот, Курти говореше пред пратениците во Собранието на Косово.
„Она за што се договоривме е тело чиј законски мандат ќе произлегува од рамковната конвенција за заштита на националните малцинства на Советот на Европа. Отворени сме да бараме инспирација од европски примери и насоки од европските стандарди на практика кои не се засноваат на територијалност. Ние цврсто и силно се спротивставуваме на територијалната етнонационализација, тоа не може да се толерира од една демократска република и е спротивно на вредностите и верувањата на нашата прогресивна власт. Во согласност со нашите обврски, ќе започнеме широк процес на консултации, како во Косово, така и со нашите партнери, исто така и со немнозинската српска заедница, како и со другите малцинства, кои се тука на Косово, за да можеме да продолжиме да разговараме за повеќе сеопфатно за ова прашање. Никогаш, повторувам, никогаш, што значи дека никогаш, никаде, нема да разгледувам било кој модел на територијална автономија“, рече Курти.
Во однос на Српската православна црква, Курти рече дека нема ништо ново освен потврда на гаранциите кои веќе постојат во уставниот и правниот систем на Косово.
„Исто така, ја презедовме обврската да го формализираме статусот на СПЦ во Косово и да обезбедиме високо ниво на заштита на објектите од верско и културно наследство во согласност со постоечките европски модели. За волја на вистината, сите знаеме дека нашите постоечки модели далеку ги надминуваат европските искуства во овој поглед. Меѓутоа, се смета дека статусот не е регулиран и немам причина да избегнувам дијалог со поглаварите на Српската православна црква за оваа цел, нема да стапиме во дијалог со Владата на Србија на оваа тема. Тоа нема да претставува ништо добро, туку само потврда на оние гаранции кои веќе постојат во нашиот уставно-правен систем“, рече тој. Курти рече дека ЕУ ќе ги зголеми обврските кон договорот и анексот на условите за напредување кон понатамошна интеграција во ЕУ.
„Непотпишувањето на договорот од страна на Србија не ги намалува обврските од ЕУ“, смета Курти.
За потсетување, Косово и Србија се договорија за имплементација на договорот за нормализација на односите постигнат на 27 февруари во Брисел, информираше високиот претставник на Европската унија (ЕУ) за надворешна политика и безбедност Џозеп Борел на 18 март по повеќечасовните разговори во Охрид со српскиот претседател Александар Вучиќ и косовскиот премиер Албин Курти.
