Премиерот на Република Северна Македонија Христијан Мицкоски упати божиќна честитка во која посака граѓаните да го поминат овој празник во духовен мир, со радост во срцата, во кругот на семејството и најблиските.
„Раѓањето на Спасителот на светот е симбол на љубовта, милосрдието и жртвата за доброто на човештвото. Овој свет ден нè потсетува на вистинските вредности – вербата, надежта и љубовта, кои треба да нè водат во секојдневниот живот. Божиќ нè повикува и да бидеме солидарни, да си помагаме еден на друг и да ја споделуваме радоста со сите околу нас“, истакна Мицкоски во пораката.
Тој нагласи дека во време кога предизвиците се бројни, оваа празнична атмосфера нè поттикнува на размислување за заедништвото и единството, како најсилен темел за изградба на подобра иднина. „Нека Божиќ биде потсетник дека со вера, труд и меѓусебно разбирање можеме да создаваме општество исполнето со мир, правда и напредок“, се вели во божиќната порака на премиерот.
„Нека Божиќ ни даде нова сила да работиме заедно и да создаваме големи дела за доброто на сите граѓани, негувајќи ја традицијата и духовноста како темели на нашето општество. Посакувам да го поминеме овој празник во духовен мир, со радост во срцата, во кругот на семејството и најблиските. Нека Божјата милост нé води низ животот, носејќи благосостојба, здравје и успех во секој наш чекор“, порача Мицкоски.
