Министерот за градежништво, транспорт и инфраструктура на Србија Горан Весиќ најави дека утре ќе поднесе оставка, по несреќата на Железничката станица во Нови Сад кога 14 лица загинаа, а тројца беа тешко повредени.
„До сега се немам огласено од почит кон жртвите и нивните семејства. Оставка ја поднесов истиот ден кога се случи несреќата во Нови Сад. Сакам да ве информирам дека утре наутро ќе ја поднесам оставката до премиерот, а кога српскиот парламент ќе ја потврди мојата оставка, ќе престанам со министерската должност и во технички мандат. Поднесувам оставка како одговорен човек, Не можам да прифатам одговорност за несреќата што се случи и сигурен сум дека истрагата нема да утврди дека никој од луѓето со кои работам не се одговорни“, рече Весиќ.
Трагедијата во која загинаа 14 лица, а тројца беа тешко повредени се случи при уривање на настрешницата.
Весиќ ден по несреќата истакна дека ќе се води истрага зошто не е реконструирана настрешницата во рамки на реновирањето на објектот и дека има синџир на одговорност, но дека не може да каже кој е на врвот на тој синџир.
Реконструкцијата на станицата изградена пред шест децении започна во октомври 2021 година. Проектот го изведе Сообраќајниот институт ЦИП, а работите ги изведе конзорциум од кинески компании. По завршувањето на работите во јули 2024 година, станицата беше предадена на управување на Железничката инфраструктура на Србија.
Вишото јавно обвинителство во Нови Сад досега наредило распит на повеќе од 40 лица, меѓу кои бил и Весиќ, кој потврдил дека во саботата дал изјава во новосадската полиција, како и дека ќе продолжи да соработува со полициските и правосудните органи.
Претседателот на Србија, Александар Вучиќ, веднаш по трагедијата во Нови Сад побара кривична и политичка одговорност за уривањето на настрешницата.
