Новоименуваната Влада на Федерацијата Босна и Херцеговина денес ја презеде должноста на заедничкиот состанок одржан во седиштето на Владата на Федерацијата на БиХ во Сараево.
Премиерот на Федерацијата Босна и Херцеговина, Нермин Никшиќ, го предводеше преземањето на должноста, а на состанокот присуствуваа новоименуваните и досегашните членови на Владата на Федерацијата БиХ.
„Периодот пред нас ќе биде одбележан со реформски процеси. Сигурен сум дека ќе работиме како тим и ќе направиме чекори напред. Им благодарам на сите од претходниот состав на Владата. Амбиентот во кој работеа не беше поволен и имаме разбирање. Ние треба да се занимаваме со она што е пред нас“, рече премиерот Никшиќ на заедничкиот состанок и додаде дека Владата ќе биде отворена за конструктивна соработка.
Досегашните заменици на премиерот на Федерацијата на БиХ и федералните министри Јелка Милиќевиќ и Веско Дрљача, како и досегашните министри што денес присуствуваа на заедничкиот состанок на Владата на Федерацијата на Босна и Херцеговина му посакаа успешна работа на новиот состав и нагласија дека ќе бидат на располагање за помош.
По заедничкиот, одржан е и првиот работно-консултативен состанок на новоименуваната Влада на Федерацијата БиХ.
Да потсетиме, на шестата вонредна седница на Претставничкиот дом на Парламентот на Федерацијата БиХ на 28 април годинава беше потврдено именувањето на Владата на Федерацијата БиХ и Одлуката за именување на премиерот, заменик-премиерот и министрите во Владата на Федерацијата БиХ.
