Македонскиот премиер Христијан Мицкоски, за време на панелот на Атлантскиот совет во Вашингтон, посочи дека земјата ќе го зајакне стратешкото партнерство со САД во периодот кој претстои, и дека ќе се зголеми економската соработка.
Тој наброја повеќе големи транспортни и енергетски проекти кои ќе бидат од големо значење за локалните економии, но и компетитивноста на САД во регионот, особено со намалување на трошоците за транспорт на добра и енергенси.
Во однос на блокираната европска интеграција, премиерот Мицкоски направи паралела со критиките од европските политичари на говорот на потпретседателот Џеј Ди Венс во Минхен, односно дека во изминатите три децении пречесто ЕУ вршеше притисок во домашните прашања, што доведе до промена на името, знамето, валутата, уставот и беа направени бројни отстапки, но без конечен резултат - членство во ЕУ.
„Ние како нација направивме се што можевме, претрпевме многу понижувања и прифативме многу лоши договори заради нашата европска перспектива и заради членството во НАТО“, изјави премиерот Мицкоски.
Премиерот истакна дека сега пред нас е ново барање за промена на Уставот и тоа не гарантира извесност не евроинтегративниот пат.
„Кажете ми втор случај во Европа кој е барем од далеку сличен со нашиот, не зборувам за приближно сличен. Овој пат рековме, ако Pacta sunt servanda се применува за нас тогаш нека се применува за сите, ако ние испорачуваме тогаш очекуваме и другите да испорачаат“, рече Мицкоски и дополни: „затоа сега патувам нив светот сега да ја раширам приказната за македонската судбина, која е типичен пример за двојни стандарди“, рече премиерот.
Премиерот Мицкоски посочи дека кога се зборува за европската иднина треба да се зборува за заеднички вредности, за вештачката интелигенција, за добрата животна средина, за економијата, за подобро образование, а не за нешто кое се случувало во средниот век.
Балканизацијата на Европската Унија според него е проблем, затоа што ако се злоупотребуваат институциите во Брисел за решавање на билатерални прашања, тоа е различно од идејата на Де Гаспер, Шуман и Аденауер, основачите на европската заедница.
