Политичката криза во Бугарија се продлабочи откако претседателот на државата Румен Радев одби да ја одобри новата привремена влада бидејќи во неа ќе остане актуелниот министер за внатрешни работи Калин Стојанов.
Според бугарската новинска агенција БТА, првпат во модерната историја на Бугарија претседателот на државата го отфрли предложениот состав на привремената влада, кога Радев во понеделникот го одби предлогот на новата привремена премиерка Горица Гранчарова-Кожарева.
Радев го отфрли предлогот бидејќи меѓу 15-те членови на привремената техничка влада беше и актуелниот министер за внатрешни работи Стојанов во техничката влада на Димитар Главчев.
Претседателот ѝ дал рок до 15 часот да предложи нов кандидат, но таа одбила бидејќи одлуката ја донела по длабоко размислување.
Радев тогаш кажа дека тоа значи дека на 20 октомври нема да се одржат предвремени парламентарни избори, како што беше планирано.
Како што јави германската новинска агенција ДПА, Радев и прозападниот либерално-конзервативен сојуз Да ги продолжиме промените - Демократска Бугарија (ПП-ДБ) бараат смена на Стојанов затоа што тој не е способен да организира фер избори. Стојанов, пак, тврди дека ПП-ДБ бара негово разрешување бидејќи не ги исполнил условите за назначувањето.
Во одбрана на Стојанов, полицајци се собраа пред Канцеларијата на претседателот на државата и пред полициските станици во повеќе градови.
ПП-ДБ е обвинета дека поради политички причини се обидела да го контролира Министерството за внатрешни работи пред претстојните избори.
Привремената премиерка Гранчарова-Кожарева поднесе жалба до државниот јавен обвинител поради наводен политички притисок врз неа Стојанов да не остане актуелен министер за внатрешни работи во привремената влада.
Ова ја продлабочи политичката криза во Бугарија, која се соочува со седми парламентарни избори во последните три и пол години, но нема привремена влада да ги организира. Не се знае кога ќе се одржат предвремените избори.
Маневарскиот простор на Радев при назначувањето на нов привремен премиер е ограничен на тесен круг високи функционери.
Во исто време, сите можни кандидати за таа функција веќе се откажаа од кандидатурата, вклучително и актуелниот премиер кој ја извршува функцијата. Затоа Радев денеска го повика парламентот да го прошири кругот на носители на високи функции од кои може да избере привремен премиер.
Привремената влада, која даде заклетва на 9 април по неуспехот на прозападната коалициска влада, ќе остане на функцијата.
Именувањето на новата привремена влада по предвремените парламентарни избори на 9 јуни, сепак, најверојатно ќе биде одложено, особено затоа што парламентот е на летен одмор.
