Во повеќе градови на Србија денеска повторно се одржа акцијата „Застани, Србијо“, со која се оддава почит на загинатите при падот на настрешницата на Железничката станица во Нови Сад.
Студентските блокади продолжија, а поддршка им даваат сѐ поголем број средношколци.
Средношколците од неколку различни училишта во Белград во 11 часот и 52 минути ја блокираа раскрсницата на Кнез Милош и Немањина кај Владата на Србија, со цел да им оддадат почит на жртвите од трагедијата во Нови Сад.
„Нашите барања се исти како и студентите, ние стоиме со нив“, велат учениците.
Исто така, неколку стотици студенти на Факултетот за политички науки и на Факултетот за организациски науки 15 минути го блокираа Булеварот на ослободувањето.
Новинарите и медиумските здруженија им дадоа поддршка и на студентите пред нивните факултети во Белград, Нови Сад и Ниш. Како што наведоа, на овој начин даваат поддршка во борбата за демократија, правда и слободата на говор во општеството.
„Иако треба да бидеме во амфитеатрите и да ги подучуваме за важноста на слободата на говорот, тие сега ни даваат лекција за основните постулати на новинарството - етика, храброст и солидарност. По трагедијата во Нови Сад, тие ни докажуваат дека слободата на медиумите и слободата на говор се основните столбови на секое демократско општество“, се вели во заедничката изјава на Коалицијата за слобода на медиумите.
И четири репрезентативни синдикати во образованието ја прекинаа својата работа за поддршка на студентите „во борбата за подобро и поправедно општество“.
Во трагедијата што се случи на 1 ноември, кога се урна настрешницата на Железничката станица во Нови Сад, загинаа 15 лица, а двајца се тешко повредени.
