Универзитетскиот професор Александар Бјелиќ од компанијата Глобо и графичкиот дизајнер Дарко Марчета најавија дека за две години на специјализираната изложба Експо 2027 во Белград ќе го претстават прототипот на обновениот автомобилски бренд „Југо“, кој ќе биде во возна состојба.
Бјелиќ истакна дека како колекционер на автомобили и нов сопственик на правата на името и моделот, сака да го заштити името „Југо“ и да го врати на патиштата.
„Роден сум во Германија и никогаш не сум живеел во поранешна Југославија или Србија. Во последните 10 години, сè повеќе ме привлекува Србија, бидејќи имам српско потекло и како колекционер на класични и спортски автомобили, и секако возила на Застава, решив да иницирам заштита на брендот со дефинитивна цел да го вратам „југото“, не само како бренд туку и како возило“, изјави тој на гостувањето на РТС.
Како што рече Бјелиќ, процесот за преземање на брендот Југо бил комплициран и долг, но благодарение на квалитетниот адвокатски тим успеал да стане сопственик на тој бренд.
„Брендот Југо или Застава беше во СФРЈ, која откако се распадна се формираа нови држави, па тоа беше процес за утврдување на сопственоста на брендот. Тоа беше процес кој траеше околу една и пол година додека ги поминавме сите тие документи, гледајќи со кого треба да контактираме, каде да пријавиме и каде треба да се заштити. На крајот го заштитивме логото“, истакна Бјелиќ.
Тој додаде дека никогаш не се занимавал со производство на автомобили, иако во автомобилската индустрија е повеќе од 30 години.
„Производството никогаш не беше цел, сега бараме некој од производителите да му се допадне дизајнот. Тоа е нешто ново, да се врати тој бренд на различни пазари, но ќе знаеме повеќе за тоа во 2027 година“, рече Бјелиќ.
Според него, пред да добие идеја да ги купи правата на „Југо“, веќе направил нешто слично со најстарата марка за автомо-козметика наречена Глобо.
„Во 2009 година го купив најстариот бренд за нега на автомобили Глобо, основан во 1878 година, но имаше поинаква ситуација бидејќи тој бренд беше семеен. Едноставно не беше активен бренд. Пријдов на тоа семејство и успеав да го купам Глобо, преку кој всушност ги заштитивме правата на Југо“, објасни Бјелиќ.
Дарко Марчета, кој е задолжен за дизајнот на новото Југо, изјави дека досега е изработен модел од глина во размер 1:5, кој ќе се користи и во аеродинамичен тунел за да се провери дали аеродинамиката е соодветна пред да започне изградбата на прототип во целосна големина.
Тој истакна дека оригиналното Југо освен со покажувачите на правецот, ќе го поврзува со новиот модел и тоа што ќе има три врати.
„Целиот преден дел каде што малиот дел е навален на хаубата, го направив малку поголем и делот каде што се светлосните трепкачи и браникот, сè е интегрирано во еден пластичен дел. Исто така браникот на дното што ќе вшмукува воздух, некои „југа“ го имаа, некои не", рече Марчета.
Како што рече, постои можност новото Југо да има и пеперутка-прозорец, што би било уште една врска до оригиналното Јјуго 2, додека планот е на задната страна да има светлечки натпис Југо.
Според него, бројни детали влијаат на цената, но важно е новото Југо да не е скапо и автомобилот да е достапен како што беше оригиналниот автомобил.
Според досега објавените информации, автомобилот ќе ги исполнува сите прописи за издувни гасови и безбедност.
Новото Јјуго е планирано да се движи исклучиво со бензински мотор, но не е исклучена можноста да се движи и на струја.
