Институтот за исчезнати лица од Босна и Херцеговина сè уште трага по 7.626 исчезнати лица. Во тек е и процесот на прием на нови извештаи за исчезнати лица, а оваа постапка не е затворена без оглед на протокот на време.
Оваа година, Институтот доби 30 нови извештаи за исчезнати лица. Во текот на оваа година истражителите на Институтот во потрага по локации каде што потенцијално има остатоци од жртвите, кои сè уште се водат како исчезнати, 837 пати излегле на терен.
„Кога станува збор за ексхумација, се реализираа нешто повеќе од 90 барања за ексхумација и асанација кон обвинителството на БиХ оваа година, а беа реализирани 89 ексхумации и седум асанации на теренот“, изјави за Анадолу портпарол на Институтот, Емза Фазлиќ.
Асанации на теренот значат собирање на остатоци лоцирани на површината на земјата.
"И 30 години по војната, сè уште ги наоѓаме остатоците од жртвите од тој период на површината на земјата. Во најголем дел, овие остатоци се наоѓаат на теренот што го покрива нашата регионална канцеларија во Тузла. Но годинава имавме два вакви случаи во Бања Лука. Од овие 89 ексхумации и асанации, за жал, многу не беа успешни. До крајот на ноември, остатоците од 60 жртви на минатата војна беа ексхумирани,“ објасни Фазлиќ.
Во текот на изминатата година, продолжи поинтензивниот процес на идентификација на ексхумираните жртви.
"Оваа година го вративме името и презимето за 82 жртви од војната. Ова не е конечен број со оглед на тоа што имаме закажано идентификации во декември, некои веќе се извршени, така што тој број ќе биде малку повисок до крајот на годината“, рече Фазлиќ.
Според неа, во текот на изминатата година се извршени 112 реексхумации, што всушност подразбира процес на додавање на остатоци од жртвите, кои биле пронајдени и идентификувани по првата идентификација и погребување.
Додека се работи на ексхумација и идентификација на жртвите, паралелно се врши процесот на верификација односно проверка на извештаите за исчезнатите лица. До денес официјално се верификувани 29.819 исчезнати лица во Босна и Херцеговина во текот на изминатиот период.
"Институтот за исчезнати лица на Босна и Херцеговина сè уште трага по 7.626 исчезнати лица и навистина се работи за исклучително тешки и комплицирани случаи. Не сакаме да кажеме дека нема да најдеме некого. Ние ќе ја завршиме оваа работа сè додека не го најдеме последното лице или дознаеме за нивната судбина. Веројатно нема да се најдат сите посмртни останки, но веруваме дека тоа ќе биде мал број. Исто така, постои процес на примање нови извештаи за исчезнати лица, оваа постапка не е затворена без оглед на протокот на време. Оваа година добивме 30 нови апликации за исчезнати лица“, изјави Фазлиќ.
