Германскиот канцелар Олаф Шолц во денеска ја потврди силната поддршка на неговата земја за кандидатурата на Босна и Херцеговина за членство во Европската унија.
На заедничката прес-конференција со Денис Бечировиќ, претседател на Претседателството на Босна и Херцеговина, Шолц рече дека пристапувањето на земјите од Западен Балкан во ЕУ е одамна задоцнето и овој процес мора да се забрза.
„Германија интензивно работи за да обезбеди земјите од Западен Балкан да имаат иднина во Европската унија“, рече Шолц, додавајќи дека Босна и Херцеговина неодамна постигна важен чекор кон оваа цел мислејки на одлуката за отворање на преговорите.
Шолц, исто така, подвлече дека Босна Херцеговина мора да ги преземе неопходните чекори за членство во ЕУ, да постигне напредок во политичките и економските реформи.
Во однос на контроверзните изјави од српскиот ентитет на Босна, Република Српска, Шолц рече дека за Германија секој обид да се доведе во прашање суверенитетот и територијалниот интегритет на Босна Херцеговина е неприфатлив.
„Ја поддржуваме важната улога што ја игра високиот претставник за Босна и Херцеговина во промовирањето на демократијата, владеењето на правото и човековите права. Неговите напори помагаат да се следи спроведувањето на Дејтонскиот договор од 1995 година и со тоа да се обезбеди мир“, рече тој.
Шолц рече дека Германија ќе продолжи да обезбедува воен контингент за ЕУФОР-АЛТЕА, мултинационалните сили за поддршка на почитувањето на Дејтонскиот договор.
