Влада со ротирачки премиер не е новитет на светската политичка сцена. Такви примери има во поблиското и подалечното минато. Бугарија е последна држава во низата која во следните 18 месеци ќе биде управувана од двајца премиери по принципот на ротација на функцијата.
Премиерите кои ротираат можат да бидат од иста или од различна политичка партија, да бидат од иста коалиција, да делат исти или слични идеолошки ставови, но ротацијата може да биде и резултат на политички договор односно компромис. Во продолжение посочуваме на неколку ротации на премиерската позиција кои се случиле или треба да се случат.
Двајца премиери во Бугарија за 18 месеци
Неможноста Бугарија да состави политичка влада повеќе од две години и пет изборни циклуси ги принуди двете политички партии ГЕРБ и коалицијата Продолжуваме со промените – Демократска Бугарија да направат коалициона влада. Владата ќе функционира 18 месеци. Двете политички опции ќе имаат премиер по девет месеци.
Николај Денков од Продолжуваме со промените – Демократска Бугарија се очекува да биде премиер во првите девет месеци, а Марија Габриел од ГЕРБ да биде вицепремиерка и министерка за надворешни работи. Во вторите девет месеци Габриел ќе биде на премиерската, а Денков на вицепремиерската позиција.
Ротирачки премиер и во Северна Македонија
И во Северна Македонија треба да има своевидна ротација на премиерската функција. Тоа треба да се случи во последните 100 дена од актуелната влада. Ова произлегува од договорот за формирање коалициона влада на СДСМ и ДУИ кои добија мнозинство гласови на последните спроведени избори.
Демократската унија за интеграција (ДУИ) пред изборите водеше кампања за премиер кој ќе биде од албанска националност. Во разговорите меѓу лидерот на ДУИ Али Ахмети и тогашниот претседател на СДСМ и премиер Зоран Заев беше договорено во последните 100 дена ДУИ да номинира кандидат Албанец кој ќе биде премиер. Следните редовни парламентарни избори би требало да се случат во 2024 година кога се очекува да биде спроведен во пракса и овој политички договор.
Нов премиер во Романија 18 месеци пред избори
Во Романија постои договор според кој премиерот се менува на 18 месеци пред парламентарните избори. Во март пратениците го одобрија новиот договор со кој се стави крај на политичката криза.
Централно десничарската Национал либерална партија треба да и го отстапи премиерското место на Соцјалдемократската партија 18 месеци пред изборите во 2024 година.
Израел специфичен пример во светската политика
Во Израел ротациона влада била воспоставена уште во 1984 година. Договор постигнаа политичките опоненти Шимон Перес и Јицак Шамир. Од 1984 до 1986 година владата ја предводеше Перес, а од 1986 година Шамир. Во двете ситуации алтернативните премиери предлагаа министри иако премиерот кој беше на позиција можеше да ги разрешува.
Во 2020 година Бенјамин Нетанјаху и Бени Ганц се договорија во Израел да има двоен систем со две влади. Во владиниот кабинет има министри одредени од Нетанјаху и министри одредени од Ганц со еднаква моќ и можност за гласање. Секој премиер има право да разреши министри од својот блок и секој премиер има право на вето на одлуките на другиот премиер.
Ротација на две години во Ирска
По општите избори во Ирска во 2020 година беше постигнат договор за ротациона влада. Договорот беше постигнат меѓу Фиана Феил и Партијата на зелените. Според овој договор премиерите ротираа на две години, а алтернативниот премиер беше заменик на актуелниот премиер.
