Турската амбасада во Скопје организираше прием по повод 100-годишнината на Република Туркије.
На приемот што амбасадорот на Туркије во Скопје, Хасан Мехмет Секизќок, го приреди во резиденцијата на Амбасадата, присуствуваа претседателот на Собранието на Северна Македонија, Талат Џафери, првиот вицепремиер Артан Груби, министерот за надворешни работи Бујар Османи, министерот за внатрешни работи Оливер Спасовски, министерот за здравство Фатмир Меџити, министерот за образование и наука Јетон Шаќири, министерот за правда Кренар Лога, министерот за финансии Фатмир Бесими, министерот за информатичко општество и администрација Азир Алиу, претставниците на турските организации и институции во земјата, пратеници, политичари, претставници од невладиниот сектор, дипломати, вработени во турската амбасада како и голем број поканети гости.
Приемот започна со интонирање на националните химни на Туркије и на Северна Македонија, по коишто се обрати амбасадорот Секизќок.
Турскиот амбасадор нагласи дека за Туркије, Првата Светска Војна завршила со потпишувањето на Лозанскиот мировен договор и дека истата година била прогласена Републиката.
„Ако се земаат во предвид условите во Туркије во 1920-тите години и светска конјуктура, прогласувањето на Републиката бара голема визија и потпирање на народот, бидејќи исполнувањето на концептот на Република е цел што може да се постигне само заедно со народот“, рече амбасадорот Секизќок.
Според него, во тие денови започнало големо обновување и движење напред.
„Почнувајќи од 1923 година, Туркије напредува во секоја област на патот кој беше отворен од страна на Ататурк, постигнувајќи нови придобивки. Ататурк беше лидер којшто кон светот гледаше од една широка перспектива. Со зборовите „мир во земјата, мир во светот“, тој привлекува вниманието врз себе посочувајќи дека меѓународниот мир и безбедност се неделиви, и дека не може да се остане рамнодушен за проблемите на другите народи“, додаде Секизќок.
Тој истакна дека Туркије која се наоѓа во регион во кој се спојуваат Балканот, Кавказот, Средниот Исток и Медитеранот, веќе едно столетие вложува напори за мир и стабилност на глобално ниво, и дека дава поддршка и за подалечните региони.
„Стотици години заедно живеевме на Балканот. Заедно го изградивме културното богатство на овие територии. Задоволни сме што забележуваме колку голема љубезност постои кон Туркије на Балканот со кој имаме цврсти врски. Исто така, среќни сме што забележуваме дека Турците во Северна Македонија, кои се меѓу народите основачи на оваа земја, имаат посебно место во нашите односи“, нагласи турскиот амбасадор.
Меѓу другото, Секизќок во своето обраќање говореше и за врската помеѓу Ататурк и Северна Македонија.
„Корените на предците на Ататурк се протегаат до Северна Македонија. Исто така, знаеме дека Ататурк во своите млади години го дишел воздухот на мултикултурна и шарена атмосфера на Северна Македонија. Годините кои како истакнат ученик на воената школа и како капетан ги поминал во овој регион, имаат големо влијание врз неговиот пат да стане голем лидер. По прогласувањето на Републиката, Ататурк стана извор на инспирација за другите народи. Во овој поглед, тој остави свој белег во историјата. На Ататурк, кој ни ја подари Републиката, се сеќаваме со почит и благодарност. Нека ни е честита 100-годишнината од Републиката“, додаде турскиот амбасадор во Скопје, Хасан Мехмет Секизќок.
