Словенечката влада во четвртокот донесе уредба за продолжување на граничните контроли со Хрватска и Унгарија за шест месеци.
Регулативата стапува на сила на 22 декември, а граничната контрола ќе трае до 22 јуни 2024 година.
Како причина за продолжување на контролата, Владата ги наведе влошувањето на безбедноста на Блискиот Исток и заканата од тероризам.
„Владата на седница ја усвои Уредбата за продолжување на инспекциите на внатрешните граници со Хрватска и Унгарија за шест месеци, беше соопштено по седницата.
Мерките за обезбедување јавен ред и внатрешна безбедност се преземаат поради влошувањето на безбедносната состојба на Блискиот исток, повиците на терористичките организации за извршување насилни дејствија во западните земји, како и продолжувањето на руската инвазија на Украина, безбедносната ситуација во Авганистан и насилството во некои африкански земји, се наведува во соопштението.
Министерот за внатрешни работи, Боштјан Поклукар, веќе во ноември најави дека Словенија ќе го продолжи надзорот на границата за уште шест месеци поради средното ниво на закана од тероризам во Словенија и високото ниво на закана од тероризам во Европската унија.
Словенија воведе гранична контрола на 21 октомври, по одлуката на Италија да воведе гранична контрола со Словенија.
Слично на Италија, Словенија ги наведе заканите за јавниот ред и внатрешната безбедност во ЕУ, ситуацијата на Блискиот Исток и Украина и спречувањето на тероризмот меѓу причините за одлуката за привремено повторно воведување на граничната контрола.
Нивото на терористички закани во последно време е зголемено во неколку земји-членки на ЕУ, а словенечкото Министерство за внатрешни работи, земајќи ги предвид принципите на Шенген зоната, оцени дека заканата за една земја-членка може да претставува закана за целата област. Во меѓувреме, оценката за заканата од тероризам во Словенија останува на трето ниво на скала од пет точки, додаваат оттаму.
Словенија досега вршеше гранична контрола според член 28 од Шенгенскиот акт, која може да се спроведе најмногу два месеца, до 21 декември, а сега Владата ја продолжува контролата согласно членовите 25 и 27, кои овозможуваат граничен надзор шест месеци.
