Приштина во неделата соопшти дека има докази оти Србија се обидела да го анектира северно Косово, како и дека напаѓачите долго време се подготвувале за тоа во воените бази.
„Оваа терористичка организација имаше само една цел: анексија на северот на Република Косово“, рече министерот за внатрешни работи Џељаљ Свечља.
„Со цел да се реализира оваа цел, српските институции ги организираа своите воени, логистички и финансиски капацитети“, рече Свечља за време на прес-конференцијата во полицискиот камп во северниот град Митровица.
Според Свечља, во обидот директно биле вклучени српскиот претседател Александар Вучиќ, министерот за одбрана Милош Вучевиќ и началникот на Генералштабот на армијата Милан Мојсиловиќ.
„Српскиот претседател се обиде да го негира фактот дека државата што ја предводи била вмешана во планирањето и извршувањето на нападот на 24 септември, но документите што ги објавивме претходно и снимките што ќе ги објавиме денес се јасен доказ за ангажманот на воени и државни структури во оваа организација“, рече тој.
На 24 септември дојде до судир во селото Бањска во северно Косово во близина на српската граница кога група вооружени Срби блокираа мост со два камиони.
Престрелка избувна откако групата отвори оган врз полицијата, при што еден полицаец загина, а друг беше повреден. Загинаа и тројца локални Срби.
Во регионот беа испратени голем број безбедносни сили, а затворен е и граничниот премин Брњак меѓу Косово и Србија.
Областа е место на немири од април, кога локалните етнички Срби ги бојкотираа изборите во северно Косово, по што следеа протести против изборот на градоначалници етнички Албанци.
Албанците се убедливо најголемата етничка група во Косово, по што следат Србите, од кои околу половина живеат на северот на земјата. Во услови на немири околу изборите, беа распоредени мировници на НАТО, вклучително и група дополнителни засилувања од Туркије.
Во петокот беше забележано „големо воено распоредување на Србија долж границата со Косово“, според американскиот Совет за национална безбедност, чиј портпарол го нарече распоредувањето „многу дестабилизирачки развој на состојбата“.
Косово во саботата ја повика Србија да ги повлече своите трупи. Вучиќ подоцна негираше дека Србија извршила воено засилување долж границата со Косово.
„Покрената е кампања на лаги против нашата Србија“, рече тој во видеото објавено на Инстаграм во неделата.
„Многу лажеа за присуството на нашите воени сили... Всушност, им пречи што Србија го има она што тие го опишуваат како софистицирано оружје“, додаде тој.
Косово прогласи независност од Србија во 2008 година и доби признание од многу земји, вклучително и Туркије.
Но, Белград никогаш не го призна Косово и тврди дека неговата територија сè уште е дел од Србија.
