Планот за раст на ЕУ за Западен Балкан е сосема нов и храбар пристап, кој служи како катализатор за напредок за да се затвори економскиот и социјалниот јаз меѓу Западен Балкан и ЕУ и да се создаде можност за рана интеграција на регионот во ЕУ пред де факто да се приклучи, изјави денеска Европскиот комесар за проширување и соседска политика, Оливер Вархеји.
Тој посочи дека како дел од планот се предлага финансиска помош од шест милијарди евра.
На прес-конференција во Брисел, Вархеји рече дека во процесот на проширување секогаш се зборува за „институционалниот дел од работата“ и повика фокусот овојпат да биде на „вистинската интеграција на терен“, што значи справување со тоа како ЕУ ќе ја забрза интеграцијата на економиите, општествата и државата, заедно со партнерите од Западен Балкан.
„Тоа носи реални предности за двете страни, а треба да донесе придобивки од членството уште пред пристапувањето“, рече Вархеји.
Тој посочи дека планот има четири аспекти, од кои првиот подразбира најбрза можна интеграција на заинтересираните партнери од Западен Балкан во рамките на четирите слободи, односно во делот на слободно движење на луѓе, стоки, капитал и услуги и да што е можно побрзо да се справат со преземањето на сите обврски кои произлегуваат од процесите и правилата на ЕУ.
Според него, ЕУ е подготвена да им помогне во оваа смисла и да ги стави на располагање сите средства потребни за тоа, но дека за возврат бараат тоа во голема мера да придонесе за просперитетот, стабилноста и безбедноста на регионот.
„Затоа бараме од нив да се однесуваат меѓу себе онака како што ќе се однесуваат кон нас, што значи дека откако ќе се интегрираат во рамките на четирите слободи, тоа треба да им го вратат на другите партнери од Западен Балкан“, рече Вархеји.
Тој додаде дека вториот клучен столб на овој план е да им се помогне на партнерите од Западен Балкан да го забрзаат реформскиот процес, бидејќи интеграцијата во рамките на четирите слободи подразбира тешки и сложени реформи.
„Тешки и сложени реформи кои ќе имаат корист за земјите од Западен Балкан“, нагласи Вархеји и додаде дека затоа ЕУ сака да работи заедно со земјите од Западен Балкан за да изработи детален план за секоја година со цел да се забрза напредокот на теренот кога станува збор за реформите, вклучително и во областите владеење на правото и демократијата како клучни услови за каква било интеграција во ЕУ.
Како трет аспект, тој посочи дека кога овие земји се интегрираат со пазарот и социјалните системи на ЕУ, не можат сами да го затворат јазот во финансиската поддршка и затоа ЕУ е подготвена да даде дополнителна поддршка за да се забрза оваа заедничка работа.
„Затоа и предлагаме на Алијансата да ја зголеми финансиската поддршка за реформската агенда и да обезбеди дополнителни шест милијарди евра“, рече Вархеји.
Еврокомесарот нагласи дека тој поттик на Западен Балкан му е потребен и на регионот, но и на ЕУ.
