Српскиот претседател Александар Вучиќ денес по состанокот со израелскиот претседател Исак Херцог во Белград изјави дека е горд што во Белград и во Србија нема никакви изливи на антисемитизам и тоа што еврејската заедница се чувствува добро и безбедно како и сите гости спортисти и културни работници.
Вучиќ изјави дека разговарал со Херцог за што поскоро потпишување на Договорот за слободна трговија.
„Ние денес разговаравме за сите важни прашања во однос на меѓусебната соработка на нашите две земји и она што го договоривме, а ќе видите и подоцна и по нашиот голем и важен состанок поврзан со иновациите, технологијата, вештачката интелигенција, ИКТ-секторот, потпишувањето на неколку договори. За нас од особено значење е во најкраток можен рок да го направиме Договорот за слободна трговија со државата Израел“, изјави Вучиќ во обраќањето до медиумите по средбата.
Вучиќ оцени дека двете земји имаат огромен простор за соработка во различни области и особено го издвои вмрежувањето на иновативните екосистеми и научно-технолошката соработка.
„Потоа во земјоделската соработка, односно во прехранбениот сектор и таму веќе може да се забележи напредок во 2024 година, во зголемување на пласманот на нашите производи на израелскиот пазар и обратно, во натамошно привлекување на израелските инвестиции во различни сектори, не само во недвижнини, каде што се многу успешни, многу присутни“, рече Вучиќ, наведувајќи дека разговарале и за кибербезбедноста.
Претседателот на Србија додаде дека соработката во туризмот е важна и за Србија. Херцог истакна дека двете земји имаат бескрајни можности за соработка.
