Претседателот на Азербејџан Илхам Алиев и претседателот на Србија Александар Вучиќ во Белград истакнаа дека двете земји се пријателски и се поддржуваат меѓусебно во однос на прашањето на територијалниот интегритет.
„Србија и Азербејџан меѓусебно се поддржуваа на меѓународната сцена. Ние секогаш го поддржувавме територијалниот интегритет на Србија и таа позиција нема да се промени во иднина“, рече Алиев на прес-конференцијата по средбата со Вучиќ.
Алиев посочи дека добрите односи меѓу двајцата претседатели се главен фактор за развој на односите, дека двете земји во суштина се стратешки партнери и затоа потпишувањето на декларацијата за формирање на Советот за стратешко партнерство е важен чекор. Тој истакна дека Азербејџан има богати гасни ресурси.
„Нашата улога ќе расте и ние ќе соработуваме со пријателските земји на прво место, не само кога станува збор за енергетиката“, порача Алиев.
Азербејџанскиот претседател додаде дека со Србија водат разговори и во воено-техничката сфера.
Како што рече, претставниците на двете земји мораат почесто да се сретнуваат и најави дека претседателот на Србија Александар Вучиќ ќе го посети Баку до крајот на годината, а дека тој уште еднаш ќе дојде во Белград.
Алиев зборуваше и за меѓународното право и посочи дека на меѓународните форуми се усвојуваат бројни документи и декларации со кои се бара повлекување на ерменските војници од окупираните делови на Азербејџан, но дека проблемот никогаш не е решен.
„Тоа покажува дека одлуките и резолуциите што ги носат меѓународните организации се селективни. Понекогаш резолуциите се усвојуваат за еден ден, за неколку часа, а за нивно спроведување ние мора да чекаме 27 години“, рече Алиев.
Тој додаде дека бидејќи ништо не се случува врз основа на декларации донесени во меѓународните организации, Азербејџан го користи своето право од Повелбата на Обединетите нации - правото на самоодбрана.
„Ние со сила го поддржуваме нашиот територијален интегритет и ние ги обновуваме објектите на ослободените територии. Ние тоа го правиме од пепел“, рече Алиев.
Претседателот на Србија, Александар Вучиќ изјави дека денес „останало малку од меѓународно право“. Тој оцени дека потпишувањето на декларацијата за формирање на Советот за стратешко партнерство означува почеток на ново ниво на односи меѓу двете земји.
Вучиќ рече дека разговарале за соработка во областа на енергетиката, бидејќи Азербејџан е гасна сила и дека Србија гледа како да се приклучи на кабелот за пренос на електрична енергија што ќе оди во Европа, за да обезбеди енергетска безбедност.
Тој додаде и дека Алиев станал многу популарен во Европа.
„За него обично немаа време, сега го имаат сето време за Илхам Алиев. Јас сум малку љубоморен, мене ме покануваат само околу Косово, само кога некој треба ме удри по глава, а него го покануваат бидејќи го сакаат. Тој не се смени многу, тој само ја чуваше својата земја, а само другите нека размислат дали тие можеби се менувале“, рече Вучиќ.
Српскиот претседател додаде оти се надева дека раководството на Србија ќе ја чува својата земја барем половично успешно како што Алиев го чувал Азербејџан.
