Српскиот претседател Александар Вучиќ изјави дека Србија во понеделник ќе поднесе писмено барање за одржување итна седница на Советот за безбедност на Обединетите нации, по одлуката на Централната банка на Косово, според која еврото е единствената валута за плаќање.
Вучиќ истакна дека знаат дека тука не е крајот и дека се надева дека ќе се одржи посебна седница.
„Денеска, припадниците на полицијата на Курти извршија рација кај привремените власти во Пеќ, Гораждевац, Исток и Осојан. Во исто време упаднаа и во здравствениот дом во Осојан, го затворија, малтретираат луѓе и претураат по работите“, рече Вучиќ на почетокот на своето обраќање до јавноста.
Тој додаде дека сите српски енклави на Косово биле нападнати по одлуката за укинување на динарот и дека „најсилниот удар досега е заканата од прогон на Србите, протерување на Србите од нивните вековни огништа“.
„Во однос на укинувањето на динарот, од првиот бриселски договор до принципите потпишани во 2015 година, па се до сите наредни договори, во секој од тие акти најзначајна норма е правото на Република Србија да финансира одредени дејности, здравството, образование, пензии за српското население на Косово и Метохија, што требаше да се направи преку Заедницата на српските општини“, рече Вучиќ.
Тој додаде дека Курти самоиницијативно ја донел одлуката за укинување на динарот со цел:
„Таа цел е етничко чистење на српското население од територијата на цело Косово и Метохија или како што вели Конвенцијата за геноцид: намерно подложување на Србите на неподносливи услови за живот“.
Претседателот на Србија рече дека постои дијалог бидејќи Косово не е меѓународно правно призната држава како што тврдат.
Тој ја коментираше реакцијата на Западот во врска со најавите за укинување на динарот, наведувајќи дека Соединетите Американски Држави по ова прашање имале посилна изјава од Европската Унија.
Тој посочи дека денеска почнале исплатите на плати, пензии и социјални надоместоци, а до 12 часот се исплатени околу пет милиони евра, а исплатите ќе продолжат и во понеделник.
Според Вучиќ, еврото не е легално платежно средство во Косово, ниту пак постои единствен акт што би им го овозможил тоа.
Презентирајќи податоци за тоа колку Србија издвојува за бенефиции на Косово, Вучиќ им порача на граѓаните дека не треба да се грижат и дека државата ќе направи се тие да ги добијат приходите и да најдат методи и начини.
„Нивниот единствен начин да победат е ако нема Срби на Косово и Метохија, а ние ќе дадеме се од себе Србите на Косово и Метохија да преживеат“, рече Вучиќ.
Тој рече дека ќе продолжат да работат и да разговараат со меѓународните партнери, дека во понеделник неговите писма ќе ги добијат претставниците на земјите членки на Европската унија и институциите на ЕУ и претседателите и премиерите на сите членки на Советот за безбедност на ОН.
Од крајот на војната во 1999 година, српскиот динар е во употреба на Косово, во областите каде живее мнозинско српско население, кое добива плати, пензии, социјална помош или други видови на надоместоци од буџетот на Република Србија.
Првиот вицепремиер за европска интеграција и дијалог на Косово, Бесник Бислими, рече дека еврото било и останува единствената валута во Косово.
Претходно, портпаролот на Европската унија, Петер Стано, изјави дека Европската унија е загрижена за последиците што одлуката на Централната банка на Косово може да ги има врз секојдневниот живот на косовските Срби и другите заедници поради отсуството на претходни консултации.
