Познати се четвртфиналните парови на светското првенство во фудбал во Катар. Последните две репрезентации кои се пласираа во оваа фаза се Мароко и Португалија.
Мароко направи сензација совладувајќи ја Шпанија во осминафиналето. Натпреварот по 90 минути и по продолженијата заврши 0:0. Репрезентаијата на Мароко беше поуспешна при изведувањето пенали.
Во вториот натпревар синоќа Португалија ја декласира Швајцарија со 6:1.
Претходно во четвртфиналето се пласираа Аргентина, Холандија, Англија, Франција, Хрватска и Бразил.
Во четвртфиналето во петок се среќаваат Хрватска-Бразил и Холандија-Аргентина. Во сабота се другите натпревари од четвртфиналето Мароко-Португалија и Англија-Франција.
Полуфиналните дуели се играат на 13 и 14 декември со почеток во 20 часот. Во нив се среќаваат победниците од дуелите Холандија-Аргентина и Хрватска-Бразил односно победниците од Мароко-Португалија и Англија-Франција. Финалето на Светското првенство е закажано за 18 декември на стадионот Лусаил со почеток во 16 часот. Ден претходно, на 17 декември во 16 часот на стадионот Калифа ќе се одигра натпреварот за третото место.
