Израелското бомбардирање на баптистичката болница „Ал Ахли“ во Газа во вторникот беше нашироко осудено од арапските држави.
Официјални изјави беа објавени од Саудиска Арабија, Катар, Оман, Египет, Алжир, Либан и Либија со осуда на нападот, во кој според последните изјави на Министерството за здравство во Газа, загинаа повеќе од 500 палестински цивили.
Саудиското Министерство за надворешни работи соопшти дека „најостро го осудува грозоморното злосторство извршено од страна на израелските окупаторски сили со бомбардирањето на баптистичката болница Ал-Ахли во Газа, што доведе до смрт на стотици цивили, вклучително и деца, и ранети и повредени луѓе“.
Во соопштението се нагласува дека „категорично го отфрламе овој брутален напад“ и ја повикуваме меѓународната заедница да престане да се занимава со двојни стандарди кога станува збор за „израелските криминални практики“.
Министерството за надворешни работи на Катар го опиша бомбардирањето на болницата како „брутален масакр и грозоморно злосторство против беспомошни цивили“.
Исто така, се вели дека тоа е „еклатантно кршење на одредбите на меѓународното право и меѓународното хуманитарно право. Проширувањето на израелските напади во Газа за да вклучи цивилни цели, вклучително болници, училишта и центри за население, се смета за опасна ескалација во текот на конфронтациите и навестува страшни последици за безбедноста и стабилноста на регионот“, се додава во соопштението.
Оманското Министерство за надворешни работи го осуди таргетирањето на баптистичката болница Ал-Ахли, нагласувајќи дека она што се случи е „воено злосторство“.
Египетското Министерство за надворешни работи, исто така, го осуди израелското бомбардирање на баптистичката болница Ал-Ахли.
Во него се нагласува дека „намерното бомбардирање на цивилни објекти и цели е сериозно кршење на одредбите на меѓународното и хуманитарното право и на најосновните вредности на хуманоста“.
Алжирското претседателство го осуди „намерниот напад врз болницата во Газа од страна на окупационите сили“.
Либанскиот премиер Наџиб Микати, исто така, го осуди чинот, кој доведе до пад на „стотици маченици во Баптистичката болница во Газа како резултат на израелско злосторство“ и ја осуди „глобалната совест која молчи за неправдата“.
Во Либија, шефот на Владата на национално единство, Абдул Хамид Дбеибех, рече дека таргетирањето на баптистичката болница Ал-Ахли во Газа „од страна на израелските окупаторски сили е брутално злосторство“.
Претходно во вторникот, портпаролот на Министерството за здравство во Газа, Ашраф Ал-Кудра, изјави за Анадолу дека повеќе од 500 Палестинци загинале во израелското бомбардирање.
Портпаролот на израелската армија рече дека „сè уште не се достапни сите детали“ за тоа што се случило во болницата.
Како дел од конфронтацијата со палестинската група Хамас и другите фракции, Израел продолжи 11-ти ден со интензивни напади врз Газа и прекин на вода, струја, храна и лекови за Појасот.
Ова предизвика локални и меѓународни предупредувања за двојна хуманитарна катастрофа паралелно со интензивните израелски рации и апсења во градовите и населбите на окупираниот Западен Брег.
