Налозите за апсење на Меѓународниот кривичен суд (МКС) за израелскиот премиер Бенјамин Нетанјаху и поранешниот министер за одбрана Јоав Галант не се политички одлуки и мора да се почитуваат, изјави во четвртокот високиот претставник на Европската унија за надворешни работи, Жозеп Борел.
МКС во четвртокот објави дека издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за наводни воени злосторства извршени на палестинските територии, вклучувајќи го и Појасот Газа.
„Тоа не е политичка одлука и одлуката на судот мора да се почитува и спроведе“, рече Жозеп Борел на заедничката прес-конференција со јорданскиот министер за надворешни работи Ајман Сафади во Аман.
Борел нагласи дека одлуката е „обврзувачка“ и дека сите членови на судот, во кои се вклучени сите членки на Европската унија, мора да ја спроведат одлуката.
Налозите за апсење доаѓаат повеќе од една година по почетокот на израелската смртоносна офанзива на Појасот Газа во која загинаа повеќе од 44.000 Палестинци, главно жени и деца, а повеќе од 104.000 беа повредени од 7 октомври минатата година.
Израелските напади предизвикаа внатрешно раселување на речиси целото население на Газа во услови на постојана и намерна блокада што доведе до сериозен недостиг на храна, чиста вода и лекови, туркајќи го населението на работ на глад.
