Бројот на загинати во земјотресот што минатата недела ја погоди провинцијата Сечуан во западна Кина се искачи на 93 додека спасувачите продолжуваат да трагаат по преживеани, соопштија денеска властите.
Тие соопштија дека бројот на загинати од земјотресот со јачина од 6,8 степени по Рихтер се искачи на 93, додека повеќе од 270 лица се повредени и хоспитализирани.
Уште 25 лица се водат како исчезнати од неделата вечерта, соопштија спасувачите, објави државната телевизија CCTV.
Потрагата по преживеани беше отежната поради силниот дожд и ризикот од лизгање на земјиштето.
Спасувачките мисии се отежнати и од ридскиот терен, врнежите, непристапните патишта, а кинеските власти распоредија сателити, беспилотни летала и хеликоптери за да помогнат во спасувањето на жртвите од земјотресот.
Илјадници луѓе беа раселени и преместени на побезбедни места.
Според Кинескиот центар за земјотресна мрежа, земјотресот го погоди округот Лудинг во автономниот регион Гарзе во Тибет на длабочина од 16 километри минатиот понеделник попладне.
Округот Шимијан во регионот Јаан и тибетскиот автономен регион Гарзе беа најтешко погодени.
Ова е најсмртоносниот земјотрес од земјотресот во 2008 година во кој загинаа илјадници луѓе. Истата провинција беше погодена од друг силен земјотрес во 2017 година, во кој загинаа 25 лица.
Земјотресот сериозно оштети куќи, историски локалитети, патишта, водоводи и хидроцентрали, што влијаеше на снабдувањето со електрична енергија и на телекомуникациите.
