Бунтовничката алијанса, позната како „Сојузот на реката Конго“, која ги вклучува бунтовниците М23, прогласи прекин на огнот на истокот од Демократска Република Конго од 4 февруари.
Во соопштението, алијансата ги наведе „хуманитарните причини“ како основа за прекин на огнот откако тие зазедоа територија во источните делови на земјата
Бунтовниците од М23 минатата недела ја презедоа контролата врз Гома, главниот град на провинцијата Северен Киву.
Тешките судири меѓу владините сили и бунтовниците предизвикаа бројни жртви и повредени.
Министерството за здравство на Конго соопшти дека 773 тела биле донесени во мртовечниците во Гома до 30 јануари, а некои останале на улиците поради пренатрупаност во мртовечниците.
Алијансата на бунтовниците соопшти дека ги осудува вооружените сили на Конго што продолжиле да користат авиони да ги бомбардираат ослободените области.
Тие, исто така, рекоа дека немаат намера да го заземат Букаву, главниот град на провинцијата Јужен Киву, или други области.
„Сепак, ја повторуваме нашата посветеност за заштита и одбрана на цивилното население и нашите позиции“, се вели во соопштението.
Сепак, ДР Конго вети дека ќе ја врати Гома, дом на околу осум милиони луѓе, вклучително и еден милион раселени.
Владата во Киншаса ја обвини соседната Руанда дека испраќа војници во Гома за поддршка на М23.
Претседателот на Руанда, Пол Кагаме, кој често ги негираше тврдењата дека го поддржува М23, рече дека не знае дали војниците од неговата земја се присутни во ДР Конго, но нагласи дека Руанда ќе направи се за да ја заштити својата безбедност.
Според податоците на ОН, најмалку 900 луѓе се убиени, а 2.880 се повредени во најновите борби во и околу Гома, најголемиот источен град во Демократска Република Конго.
Во изминатите три години, регионалните борби раселеа стотици илјади луѓе, а од почетокот на 2025 година, повеќе од 400.000 луѓе беа принудени да ги напуштат своите домови, според Агенцијата за бегалци на ОН.
Групите за човекови права бараат поголем притисок врз Руанда да се повлече од ДР Конго, додека министерот за комуникации на земјата ја повика меѓународната заедница да воведе санкции кон Руанда.
Претседателите на ДР Конго и Руанда во петок треба да учествуваат на регионалниот мировен самит во Танзанија.
