Новата австриска влада на Народната партија, социјалдемократите и либералите најави построги правила за азил и бегалци при претставувањето на владината програма во четвртокот во Виена, а претставниците на коалициските партии изразија задоволство од договорот по долги преговори.
„Договорот успеа само благодарение на типично австрискиот пристап: разговорите ги зближуваат луѓето“, рече Кристијан Штокер, претседател на Австриската народна партија (ОВП).
Штокер рече дека „другите ја избегнаа одговорноста“, алудирајќи на неуспешните преговори меѓу ОВП и десничарската популистичка Партија на слободата на Австрија (ФПО), кои пропаднаа пред неколку дена.
Претседателите на ОВП, Социјалдемократската партија на Австрија (СПО) и либералната партија Неос веќе поднесоа коалициски договор до австрискиот претседател Александар ван дер Белен на разгледување.
Овие три партии веќе преговараа за формирање влада, но преговорите пропаднаа, по што ФПО се обиде да формира партија со ОВП, што исто така не успеа.
Забрана за шамии за девојчиња
Коалициската програма содржи силно заострување на законите за бегалци и азил.
Па така, обединувањето на семејствата за лицата на кои им е одобрен азил е суспендирано до понатамошно известување. Луѓето чии барања за азил се одбиени повеќе нема да можат да го поминуваат времето на слобода до нивното протерување, туку ќе бидат сместени во специјални центри.
Промени се предвидуваат и во кривичното право во секторот тероризам со идеолошка позадина.
Како дел од пакетот закони кои треба да ја подобрат интеграцијата на имигрантите од другите култури, ќе се забрани носењето шамија за девојчиња помлади од 14 години.
„Оваа мерка служи за спречување на сегрегација и угнетување на девојчињата“, се наведува во програмата на коалицијата.
Се проценува дека со заострување на законите за имиграција, целта е да се лиши ФПО, која доби најмногу гласови на изборите во септември, од надлежност за едно од најважните партиски прашања.
Коалициската програма предвидува и олеснување и подобра заштита на потстанарите.
Во однос на надворешната политика, новата австриска влада продолжува да се залага за „солидарност во рамките на Европската унија“, како и за натамошна помош за Украина. Новата влада планира да назначи и специјален координатор за помош на Украина.
Засега нема конкретна дискусија за распределбата на министерствата, но извесно е дека функцијата канцелар ќе ја заземе лидерот на ОВП Кристијан Штокер, а министер за надворешни работи лидерката на партијата Неос, Беате Мајнл-Рајзингер.
Владата треба да положи заклетва следниот понеделник, што е 155 дена по парламентарните избори во септември и најдолгиот период во историјата на Република Австрија од избори до преземање влада.
