Двајца тинејџери се обвинети за подготовка на терористички акти како дел од истрагата поради сомнение за терористичка активност од страна на крајната десница, соопшти Метрополитенската полиција.
Осумнаесетгодишниот Рекс Вилијам Хенри Кларк и 19-годишната Софија Виноградова вчера се обвинети за подготовка на терористички акти, соопшти полицијата синоќа.
Дополнително, Виноградова се соочува со две обвиненија поради собирање информации што би можеле некому да му помогнат во извршувањето или подготовката на терористички акт.
Полицијата нагласи дека оваа истрага се однесува на сомнение за тероризам од страна на крајната десница и не е поврзана со последните немири во Велика Британија.
Немирите беа поттикнати од дезинформациите на интернет дека лицето уапсено како осомничено за фаталниот напад со нож во Саутпорт, Велика Британија, минатата недела било муслимански барател на азил, тврдење што беше лажно.
На двајцата тинејџери им е одреден притвор и денес треба да се појават во Вестминстерскиот суд.
„Ова се сериозни обвиненија, но ја повикувам јавноста повеќе да не шпекулира за овој случај во моментов и да дозволи процесот на кривичната правда да продолжи без мешање“, рече командантот Доминик Марфи, шеф на Антитерористичката команда на лондонската полиција.
