Европскиот суд на правдата денес изрече пресуда дека Унгарија неоправдано создала нови регулативи за барање азил поради пандемијата на Ковид-19.
Регулативата наложуваше бегалците да патуваат до унгарските амбасади во српскиот главен град Белград или во украинскиот главен град Киев за лично поднесување изјава за намера пред официјално да побараат азил на границата.
Врз основа на нивното барање, унгарските власти понатаму би одлучиле дали ќе дадат дозвола за барателите на азил.
„Со тоа што самата можност за поднесување барање за меѓународна заштита зависи од претходно поднесување изјава за намера до амбасада лоцирана во трета земја, Унгарија не ги исполни своите обврски според правото на ЕУ. Законот ги лишува граѓаните од земјите кои не се членки на ЕУ и лицата без државјанство од ефикасно користење на нивното право за барање азил од Унгарија “, нагласи судот.
Судот, исто така, утврди дека тоа не може да се оправда како мерка за борба против ширењето на пандемијата, бидејќи тоа дури и ја зголемува шансата за зараза со коронавирусот кога се бара од барателите на азил да патуваат низ други земји.
