Словачкиот премиер Роберт Фицо денеска изјави дека група странски „експерти“ кои учествувале во немирите во Грузија и на Мајдан работат во Словачка со цел да ја соборат актуелната влада.
Тој ова го изјави на прес-конференција во врска со протестите на опозицијата во таа земја против актуелната власт и додаде дека групата е под надзор и е финансирана од САД, пренесува словачкиот портал Правда.
„Словачката опозиција се подготвува за Мајдан и окупација на владини згради“, рече Фицо, додавајќи дека во четврток во врска со тоа свикал седница на Советот за национална безбедност.
Претходно, Фицо се сретна со словачкиот претседател Петер Пелегрини и со шефот на Словачката разузнавачка служба (СИС) Павле Гашпар и со претставници на други државни сили во врска со извештајот на СИС, во кој се наведува дека службата има информации за организирано странско влијание за дестабилизација на Словачка.
„Во нормална демократска држава под владеење на правото, безбедносните сили ќе интервенираат бидејќи тоа е кршење на законот, дури во некои случаи и прекршување на кривичното право“, рече тој во врска со протестите на опозицијата, додавајќи дека „сите телевизии во светот“ би се собрале и би создале слика за тоа како интервенира полицијата, како и дека ќе има масовни протести и преземање на власта во државата.
Фицо истакна дека ги почитува правата на граѓаните кои можат да се собираат, но дека државата не може да толерира кршење на законите.
Според него, на седницата на Советот за национална безбедност ќе се расправа за превентивни мерки за спречување на ескалација.
Опозицијата извештајот на СИС го нарече апсурден, а наводите во извештајот ги демантираат и организаторите на протестот.
Словачкиот опозициски лидер Михал Шимечка во вторник покрена иницијатива за гласање недоверба на левичарско-националистичката коалиција, обвинувајќи го премиерот Роберт Фицо дека подготвува терен за излез на земјата од Европската унија.
Сепак, тој во текот на денот се откажа од намерата.
Роберт Фицо во мај лани преживеа атентат, откако напаѓач незадоволен од политиката на Владата пукаше во словачкиот премиер, кој беше погоден со неколку истрели.
