Туркије и Соединетите Американски Држави денеска се договорија за овозможување непречена испорака на хуманитарна помош за Газа, каде Израел продолжува со нападите од повеќе фронтови од нападот на палестинската група Хамас на 7 октомври, соопштија турски дипломатски извори, јавува Анадолу.
Турскиот министер за надворешни работи, Хакан Фидан, и американскиот државен секретар, Ентони Блинкен, се состанаа денес во Анкара за да разговараат за тековните случувања во опколената енклава, како и за билатералните односи.
По средбата немаше официјално соопштение, но, според изворите, Фидан му ја потенцирал на американскиот колега неопходноста да се спречат нападите на Израел врз цивилите, да се спречи раселувањето на населението во Газа и побарал итен и сеопфатен прекин на огнот.
Двете страни ја потврдија својата согласност за важноста да се спречи штета врз цивилите и да се обезбеди континуирана и непречена испорака на хуманитарна помош, рекоа изворите, додавајќи дека „на средбата, исто така, беше истакната важноста од заедничка работа на дводржавното решение.
Фидан нагласил дека бомбардирањето цивилни цели и цивилна инфраструктура во Газа е неприфатливо.
Во конфликтот досега загинаа над 10.000 Палестинци и над 1.600 Израелци.
Покрај големиот број жртви и масовните раселувања, основните резерви се при крај за 2,3 милиони жители на Газа поради израелската опсада.
Двајцата министри разговарале и за процесот на проширување на НАТО во рамките на членството на Шведска, како и за билатерални и регионални прашања, соопштија изворите.
