Министерот за надворешни работи на Република Туркије Хакан Фидан изјави дека евентуалната војна меѓу Израел и Иран треба да се смета како голема можност и предупреди дека Туркије и регионот треба да бидат подготвени за тоа.
Фидан во интервју за Хабер Глобал ја коментира актуелната ситуација во Туркије и регионот.
На прашањето да ги коментира израелските тврдења дека шефот на политичкото биро на Хамас Јахја Синвар бил убиен во напад во Газа, Фидан потсети дека Туркије на сите платформи од 7 октомври 2023 година предупредува дека војната ќе ескалира и ќе донесе геополитички проблеми.
Во врска со тврдењето дека Синвар е убиен, Фидан рече дека се уште нема потврда од Хамас и дека треба да почекаме.
„За жал, Газа е претворена во гробишта под отворено небо каде се убиени десетици илјади невини луѓе и извршен е геноцид“, рече Фидан.
Запрашан за неговиот состанок со лидерот на Хезболах, Хасан Насрала пред да биде убиен, Фидан рече дека по состанокот истакнал дека Хезболах нема да изврши сеопфатен напад и дека ќе ја задржи сегашната позиција.
Фидан изјави дека тогаш оцениле оти Израел е во воен акционен план еден по еден да ги елиминира Хамас, Хезболах, Хутите во Јемен и други елементи кои претставуваат закана за него.
Тој посочи дека земјите од регионот не ја покажуваат чувствителноста што ја покажуваат кон Палестина кога станува збор за Либан.
На прашањето дали ќе има воена состојба меѓу Израел и Иран, Фидан рече дека тоа треба сериозно да се разгледа како многу можно.
„Ова треба да се смета за голема можност. Мислам дека тоа би било најточниот чекор земјите од регионот да го оценат тоа како голема можност, бидејќи мора да бидеме подготвени за таква можност. Како регион, ова проширување на војната, се разбира, не е она што го сакаме“, рече Фидан.
Истакнувајќи дека Туркије прави интензивни напори за да обезбеди мир и да стави крај на конфликтите во последните 20 години, Фидан рече дека Анкара на никаков начин не поддржува никаков конфликт со Иран или почеток на војна.
„Ние сме целосно против тоа, но од друга страна, доколку Иран дејствува во самоодбрана, се разбира, тоа е негово право“, изјави Фидан.
